«Өстебезгә такта араларыннан ут төшә, чытырдап янган тавыш әле дә колагымда ишетелә сыман»

Өелеп торган салам яна дип уйлап, йөгереп чыктым. Сарай ишеген ачсам, печәнлектә – кып-кызыл ут ялкыны. Үземне тыныч тотарга тырышып, баларымны ярдәмгә чакырдым. Без кире чыкканда, ялкын бөтен печәнлекне чолгап алган иде. Ярый әле уртанчы улым каушап калмыйча, бәйләп куйган сыерларны, таналарны ычкындырган. Өстебезгә такта араларыннан ут төшә. Чытырдап янган тавыш әле дә колагымда ишетелә сыман. Янда беркем юк, куркыныч. Янгын сүндерүчеләрне чакыртыр өчен телефон номерын да чак җыйдым. Бер секунд бер сәгать булып тоелды.

Иң беренче машина Биектау районының Мәмдәл авылыннан килде. Янгын сүндерү бүлеге җитәкчесе Камил Шакирҗановка, барлык хезмәткәрләргә бик рәхмәтлемен. Сарайны коткарып булмый иде инде. Аллаһыга шөкер, өебезне нык сакладылар. Газ, электр уты буенча хезмәткәрләр, ашыгыч медицина ярдәме машинасы да тиз килеп җитте. Авыл кешеләре дә нык ярдәм иттеләр. Бу дөнья адәм балаларына сынаулар бирә, бу хәлләрне сабырлык белән үткәрергә тырыштык. Үзебез исән-сау, йортыбыз зыян күрмәде, малкайларыбыз исән калдылар, дип сөенәбез. Авылда төпләнеп яши башлаганнан бирле, малкайларым минем өчен иптәш тә, сердәш тә. Мин аларга, гел яратып, «малкайларым» дип эндәшәм. «Без төнлә йоклаганда да сез ял итмисез бит, бер чиләк сөт әзерләп куясыз», – дип, сыерларыма рәхмәт укыйм. Кешеләргә хезмәт иткән малкайларны беркайчан дә рәнҗетмәсәк иде.

Бу вакыйга күп нәрсәләрне аңларга ярдәм итте. Кешеләргә булган ихтирамым тагын да артты. Янгын вакытында бер бөртек күз яшем чыкмады, ә ахырдан, кешеләрнең безгә ярдәм итүләрен күреп, шатлык яшьләрен тыеп булмады. Авылдашларыма, күршеләремә, туганнарга, «Шәһри Казан» газетасында басылган язма аша бөтенләй таныш булмаган ярдәм кулы сузучыларга – барысына да зур рәхмәтемне җиткерәсем килә. Сыерларга су эчертергә чиләкләрем дә юк иде, мал абзарын тиз генә рәткә китереп булмас дип борчылган идек, шөкер, барысы да җайланды. Безгә ярдәм иткәннәргә изге гамәлләре игелек булып үзләренә әйләнеп кайтсын. Аллаһы Тәгалә рәхмәте кешеләр рәхмәте эченә яшеренгән. Илләребез, көннәребез тыныч булсын. Мондый хәвеф-хәтәрләрне кичерергә язмасын.
 

Фәридә, Рамил Сафиуллиннар, балаларыбыз Илназ, Әдилә, Ильяс, Инсаф, Камилә, киленебез Наилә, киявебез Илнар.

Яшел Үзән районы, Олы Күлбаш авылы