“Пушкин карта”сы эшче яшьләргә дә кирәк

Яшьләрне эшкә җәлеп итү чаралары җитәрлек бүген. Шулай да хезмәт хакының югары булуы, социаль пакеттан файдалану мөмкинлеге арту – иң беренче ярдәм чарасы булып тора.
– 14 яшьтән 35 кадәрге яшь категориясенә кергән кешеләрне без яшьләргә кертәбез. Бу безнең республика халкының өчтән бере. Һәрбер яшь  аралыгында үзенчәлекләр җитәрлек. 14-18 яшьлекләр өчен ул бер төрле булса, мәсәлән, төрле чаралар, бәйгеләр, мәктәп тормышы аша алар үз-үзләрен күрсәтәләр. 18 яшьтән 22 кадәр студент еллары шулай ук үзгә чор. Сыйфатлы белем алу, һөнәри осталыкка ирешү өчен төрле чаралар, студент отрядлар оештырыла, – дип сөйли Тимур Сөләйманов һәрбер чорның яшь үзенчәлекләрен исәпкә алып.

Эшче яшьләргә килгәндә  исә ул бигрәк тә җаваплы чор. Мөстәкыйль тормыш, яшь гаилә, яшь белгеч өчен ярдәм чараларының вакытында булуы мөһим. 650  меңнән артык яшь кеше шушы төркемгә карый. Алар республиканың төрле оешма-предприятиеләрендә хезмәт куя. 2 ел элек эшче яшьләргә кагылган дәүләт программасы эшли башлады. Бер ел элек аларны бер платформада туплау өчен аерым Совет та булдырылган иде. Төрле эш урыннарда яшьләргә ярдәм күрсәтү буенча эшлекле сөйләшүләр дә биредә алып барыла. Эшче яшьләрне өйрәнү буенча республикада социологик тикшеренүләр дә үткәрелгән. 224ләп оешма-предприятиедәге эш урыннары өйрәнелгән.

“Татарстан оешма-предприятияләрнең яшьләр берлеге” җитәкчесе Айдар Сәгетдинов әйтүенчә, эшче яшьләргә мөнәсәбәт үзгәргән. Киләчәктә яшь табиблар, яшь машина төзүчеләр, яшь укытучылар кебек аерым белгечләр  буенча  да тармаклап өйрәнергә кирәк. Ярдәм чаралары торак мәсьәләсеннән башлап, төрле социаль пакет булырга мөмкин. Эшли торган  яшьләрнең саны да арткан. Кайчак дәүләт тарафыннан кечкенә генә ярдәм дә күп кенә проблеманы хәл итәргә мөмкин.
Мәсәлән, шул ук “Пушкин карта”сы эшче яшьләрнең ялларын үткәрү өчен кулай булыр иде. Татарстан яшьләр эшләре министры Тимур Сөйләйманов әйтүенчә, “”Пушкин карта”сы буенча сораулар күп килә. Яшь буенча да үзгәртү, төрле категория яшьләргә дә бирү мәсьәләсе бу көннәрдә үткәреләчәк форумда да күтәреләчәк. Яшьләр эшләре министры фикеренчә, бу программадан барлык яшьләр дә файдалана алырга тиеш
– Ике көн элек яшь галимнәр хәрәкәте җитәкчелеге дә  миңа мөрәҗәгать итте. Бүген яшьләр белән очрашу узган иде, алар да миңа шул программага эләгергә теләге барлыгын әйтте. Тәкъдимне Россия яшьләр министрлыгына җиткерербез. Аңлашыла, сорау финанс мөмкинлекләренә барып терәлә. Бәлкем бу программага яшьләрнең билгеле бер категориясе эләгә алыр. Мәсәлән, 35 яшькә кадәрге яшь гаиләләр, – диде Тимур Сөләйманов.