Һәр сәламәт көннең кадерен белик!

Күптән түгел танышымның баласы авырып китте. Кайсы гына табибка бармадылар – ярдәм итәрлек кеше тапмадылар. Танышымның кызы әйтергә тел дә әйләнми торган чир белән чирләп киткән. Кыскасы, яман шеш белән. Иң куркынычы шул, андые Татарстанда бер генә, ди. Һәм дәвалап та булмый торганы... Танышларым ары чаптылар, бире чаптылар, шулай да әмәлен таптылар: чит илдә дәваланырга сөйләштеләр. Ләкин суммасын ишеткәч, «күзем маңгае_ма менде», 20 миллион икән. Әле савыгамы-юкмы, анысына гарантия бирүче юк. Хикмәт бу дөнья… Мескен ата-ана, мескен бала. Ни өчен шулай? Башымда мең төрле уй...Әллә язмыш, әллә Алладан бирелгән сынау. Шулай да танышларым өметләрен өзмәделәр, кешеләрдән җыярга булдылар. Интернет челтәренә, ярдәм кирәк, дип, фотосурәт белән язма урнаштырылды. Моның кадәр акчаны җыярлар дип уйламаган да идем. Шаклар катарсың, ике ай дигәндә, акча җыелып та бетте. Инде ярдәм итә алган кешеләргә Алланың рәхмәтләре яусын. Мондый авыр сынаулар барыбызны да читләтеп үтсен.

Статистика мәгълүматларына караганда, Татарстанда 2018 елның гыйнвар аена 104711 кеше онкология белән теркәлгән. Бу – коточкыч зур саннар. Һәм иң начары – елдан-ел үсә. бу чиргә кайчан дәва табылыр, анысы караңгы.

Барыгызга да исәнлек-саулык телим! Һәр минутның кадерен белик!

Cилинә Сабитова, Казан.

Фото: pixabay.com