Һәр ялгыш адым фаҗигагә китерергә мөмкин

Гадәттә, куркынычсызлык кагыйдәләрен үтәмәү, игътибарсызлык һәм җавапсызлык аркасында күпләр бәхетсезлеккә һәм фаҗигагә дучар була. Менә шундый бәлаләрнең берсе-янгын. Социологларның тикшерүнүләре күрсәткәнчә, ел дәвамында янгыннарда меңнәрчә кеше һәлак була. Алар арасында ут чыгуда бөтенләй гаепсез кешеләр бар: балалар, олы яшьтәге кешеләр...

Быелның беренче кварталында Россиядә янгын вакытында 108 бала һәлак булган, аларның күбесе торак биналарда янгын чыгу нәтиҗәсендә үлгән. Бу хакта ТР янгын күзәтчелеге буенча баш дәүләт инспекторы урынбасары Максим Трущин сөйләде.

Аның сүзләренчә, соңгы биш елда Россиядә янгыннарда 1 мең 981 бала үлгән. Идел буе федераль округы территориясендә исә 376 бала һәлак булган, ә быелның өч аенда - 28 бала.

Татарстан буенча 2021 елның беренче өч аенда янгыннар нәтиҗәсендә ике бала вафат булган. Соңгы биш елда Татарстан Республикасының 25 муниципаль районында янгыннарда балалар үлгән.
Күпчелек очракта балалар үлеменә электр җиһазларын файдалану кагыйдәләрен үтәмәү сәбәпче булган. ә икенче бер җитди очрак - олыларның тәмәке тартканда саксызлыгы. Ут белән шаяру нәтиҗәсендә һәлак булучылар да күп. Газ һәм электрдан файдалану таләпләрен бозу, пиротехника эшләнмәләрен дөрес кулланмау, ут белән саксыз эш итү аркасында дистәдән артык баланың сәламәтлегенә зыян килгән.

— Сабыйларның янгыннарда һәлак булуы һәм зыян күрүенә, беренче чиратта, олылар гаепле, - ди Максим Трущин. - Олылар күп очракта тормыш мәшәкатъләренә уралып балаларга игътибар бирми, аларны өйдә күзәтүсез калдыра. Әйе, балалар артыннан карап бетереп тә булмый. Әмма фатирларда яки бүлмәләрдә балаларны йозакка бикләп, үзләрен генә калдырмагыз. Балаларның ут белән уйнауларына катгый рәвештә каршы килегез. Аларга мичләрне ягарга кушмагыз. Балаларның тәмәке тартмавын, шырпы белән уйнамауларын, корылмалар янында учак якмауларын катгый күзәтегез. Без барыбыз бергәләп янгын куркынычсызлыгы кагыйдәләрен үтәсәк һәм балаларыбызны шуңа өйрәтсәк, республикада балаларның ут белән уйнау очракларыннан килеп чыккан янгыннар саны күпкә кимер иде. Онытмагыз, бер генә ялгышлык та төзәлмәслек каза китереп чыгарырга мөмкин.
Иминлегебез үз кулларыбызда. Янгын куркынычсызлыгы кагыйдәләренә битараф калмасак иде.

Лилия ГАЙНУЛЛИНА

Фото: http://saby-rt.ru