Реклама тавышыннан туйдыңмы? Бетәчәк!

Казан шәһәре хакимияте дә моный таный. Әйтик, Тышкы реклама һәм мәгълүмат идарәсе җитәкчесе Әскәр Баһаветдинов, андый чакырулар кешенең психикасына начар йогынты ясый, шуның өстенә якын тирәдә яшәүчеләргә, эшләүчеләргә комачаулый. 25 августтан тавыш көчәйтү чаралары ярдәмендә тынлыкны бозу катгый тыелачак.

Казан мэры Илсур Метшин да шатлыгын яшерми.  Аныңча, тавышлы реклама шәһәр халкын, бигрәк тә Бауман урамында яшәүчеләрне һәм анда йөрүчеләрне туйдырып бетергән, тавышны тыю турында да еш сораганнар. Хәзер инде моны законга нигезләнеп тыярга мөмкин.

Гомумән, Казанда реклама өлкәсендә зур үзгәрешләр булачак. Тышкы реклама (банерлар, рәсем-сурәтләр) эшләми дисәләр дә, үз товарыңны, хезмәтеңне шул рәвешле тәкъдим итүгә ихтыяҗ бар икән. Хакимияттәгеләр әнә быел бу өлкәдә генә дә 450 млн. сум табыш алырга планлаштыра (105 миллионы инде кергән дә).

Акча эшләү белән бергә, түрәләр реклама бирүчеләрне эшләтергә дә җыена әле. Аерым алганда, автобус тукталышларын җыештыру, төзекләндерү эшенең бер өлешен аларга йөкләмәкчеләр. Шушы тукталышларда реклама урнаштыручылар турында бара сүз. Хакимият тукталышта махсус җиһазлар куя, эшмәкәрләр анда рекламасын урнаштыра һәм үз территориясен карап торырга тиеш була.

Реклама бирергә теләүчеләр бу тәкъдимнән баш тартырга җыенмый икән әле. Ә.Баһаветдинов белдергәнчә, Казанда барлыгы 200 шундый “нокта” булдыру каралган. Килешү исә биш елга төзеләчәк. Шушы вакыт эчендә шәһәр 30 млн сум кереп алырга да планлаштыра.

Фото: http://pixabay.com