Рөстәм Миңнеханов: «Химия китабын кабаттан укырга керешәм әле»

“АКСИТЕХ” җаваплылыгы чикләнгән җәмгыятьнең директорлар советы рәисе Александр Базулев сәнәгать предприятиеләрен, нефть һәм газ тармагын, чистарту корылмаларын автомат технологияләр белән җиһазландыру турында сөйләде.
- Приборлар, чит илләрдән кайтартылган төрдәшләренә алмаш сыйфатында, үзебезнең технологияләргә нигезләнеп җитештерелә. Су һәм һава чисталыгын, газ һәм су үткәргечләрендәге тишекләрне ачыклый торган приборлар Россия төбәкләрендә кулланыла инде. Киберһөҗүмнәргә каршы саклык системасы әзерләнде, ул хәзер сынау уза, - диде Александр Базлуев.

Татарстан Президентында чистарту корылмаларын автомат технологияләр белән җиһазландыру аеруча кызыксындыру тудырды.

- Нефть һәм газ тармагында яңа технологияләрне кулланырга кирәк. Ләкин, бездә чистарту корылмалары четерекле мәсьәлә, экологияне кайгырту зарур, - дип, әйтеп куйды Рөстәм Миңнеханов.

Быел - Химик элементлар эзлеклелек таблицасының халыкара елы.
- Дмитрий Менделеев 1893 елда хәзерге Менделеев шәһәрендә адмиралтия өчен дары формуласы чыгарган, - дип, искә алып әйтеп үтте Казан федераль университеты доценты Аркадий Курамшин.

- Химик элементлар эзлеклелек таблицасы халыкара елы чарасында Менделеев исеме күзгә чалынмый, - дип, борчылып сорады Рөстәм Миңнеханов.
- Дмитрий Менделеев фәндә халыкара таныла. Ачышлар нәтиҗәсендә таблицага өстәмәләр керде. Әмма химик элементлар эзлеклелек таблицасының нигезен менделеев таблицасы тәшкил итә, - дип җавап кайтарды Аркадий Курамшин.
Татарстан Президенты Рөстәм Миңнеханов Казан университеты доценты Аркадий Курамшин язган китапны мактады.

- Татарстан - нефть һәм химия республикасы. Мәгариф учреждениеләрендә химиянең дәрәҗәсен күтәрергә, аны өйрәнүне популярлаштырырга, алаларга аңлаешлы телдә җиткерергә кирәк. Сез химия турында бик аңлаешлы итеп язгансыз, химия китабын кабаттан укырга керешәм әле. Химия турында булган-булмаган белемнәрне яңартырга кирәк, - диде Рөстәм Миңнеханов.

Һәр елның 27 маенда Химиклар көне билгеләп үтелә. Менделеевның химик элементлар эзлеклелек таблицасына 150 ел тулу уңаеннан май аенда мәктәп укучылары конференциясе һәм укучылар арасында химия фәне буенча конкурс оештырырга күрсәтмә бирде Татарстан Президенты.

“Татнефтехиминвест-холдинг” ачык акционерлык җәмгыяте акционерларының еллык гомүм җыелышы быелның 22 маенда үткәреләчәге турында хәбәр ителде.
“Казан ярминкәсе” ачык акционерлык җәмгыяте генераль директоры Лев Семенов Казанда 2-4 сентябрьдә “Татарстан нефтьгазхимия форумы-2019” чарасына әзерлек эшлоәре белән таныштырды. Узган елгы форумда Россиядән - 45 һәм чит илләрдән 14 компания катнашкан.

Фото: president.tatarstan.ru