Рөстәм Миңнеханов: "Күпме еллар узса да, лагерьдагы дусларымны һаман хәтерлим"

- Мин үзем кечкенә чакта лагерьда ике генә тапкыр булганым бар, - дип балачак хатирәләрен яңартты Президент. – Күпме еллар узса да, андагы дусларымны һаман хәтерлим. Сез дә лагерьда уздырган вакытыгызны күңелле уздырырсыз, дип өметләнеп калам.

«Восток» лагерена 1967 елда – Җирнең ясалма иярчене галәмгә җибәрелүгә 10 ел булу хөрмәтеннән нигез салына. Ярты гасыр эчендә оешмада 30 мең бала ял итә. Элек лагерь 4 корпустан торган, еллар узган саен алар таушала, искерә. Һәм менә 2020 елда – ял итү урынын тулысынча үзгәртеп коралар. Хәзер ялтырап торган 7 өр-яңа йокы корпусы бар. Аларның диварларында танылган космонавтлар сурәтләнгән: Юрий Гагарин, Герман Титов, Валерий Быковский... Ә бина эче – ракеталарны хәтерләтә. Түшәменә карасаң да, идәненә карасаң да – үзеңне галәмдәге кебек хис итәсең. 

Бүгенге көндә лагерьда 200гә якын бала ял итә. Ә җәе буена оешма 800 малай-кызны кабул итә алачак. Моннан тыш, аның язын-көзен эшләү мөмкинлеге дә бар. Бүлмәләрдә җылылык батареяләре урнаштырылган. Димәк, ял итүчеләр саны тагын да зуррак булырга мөмкин. 

Гомумән, Татарстанда быел 183 604 бала –  төрле лагерьләрда ял итәчәк. Бу исемлеккә стационар лагерьләр дә, палаткалы лагерьләр дә, Кара диңгез яр буе, шифаханә-курорт һәм мәктәп яны лагерьлары да керә. Әмма барлык ял итүчеләрнең 60 %ы шулай да җәен табигатьтәге оешмаларда уздырачак.

«Җәй – балаларга» програмасы буенча Татарстанда 94 лагерьны яңартырга җыеналар. Моның өчен республика бюджетыннан 7 млрд сум акча тотылачак. Бүгенгә 23 лагерь төзекләндерелгән инде. Быел планда – тагын тугызын яңарту.

Рания Садыйкова