Рәзил Сәмигуллин: «Сәүдәмнең барышының 70-80 проценты башымдагы түбәтәйдән һәм татарча сөйләшә белүемнән»

– Каклаган каз – иң яхшы бүләк. Ничек саклыйм дип борчыласы юк, суыткычка тыкмасаң да бозылмый. Казылыкны хәзер теләсә кайсы төбәктә табып була, ә каклаган казны – юк. Әлбәттә, алсыннар, белсеннәр өчен сөйләргә, күрсәтергә кирәк. Без беләбез ул татарның иң зур сые каз икәнлеген, чит милләт кешеләре каян белсен?! Вакыт булганда, җай чыкканда, үзем, туристлар белән очрашып, тәмле күчтәнәч турында сөйлим, – ди «Казан» агропромпаркындагы кош итләре сату ноктасының хуҗасы Рәзил Сәмигуллин.

Каз иң күп сатыла торган көн – атнакич, җомга икән. Никах, туй мәҗлесләре өчен каз эзләүчеләр нәкъ менә шушы көннәрдә килә. Ким дигәндә, сигез, ун каз сатыла ди бер көнгә. Биредә – очсызрак, күргән, белгән кешеләр туп-туры бу ноктага килә икән. Авылда каз үстерүчеләрдән алганга караганда да очсызракка чыга икән дип карадым. Тагын бер өстенлеге – сатучы татарча сөйләшә.
– Ышанасызмы, юкмы – сәүдәмнең барышының 70-80 проценты башымдагы түбәтәйдән һәм татарча сөйләшә белүемнән. Пар каз татарларга кирәк бит инде, алар белән русча сөйләшеп тору бөтенләй матур булмас иде. Яшермим, монда эшли башлаганчы, татарча алай әйбәт сөйләшми идем әле, – ди Рәзил.

Каклаган каз хәзер вакуум тартмачыкларда өлешләп тә сатыла. Болай алганда, бәясе кыйммәткәрәк чыга кебек. Аның каравы, күзең төшкәч, авыз итеп була. Бөтенен алырлык акчаң булмаса, нигә 150-200 сумга алып тәмләп карамаска? Кош итләреннән йорт тавыклары да сатыла, килосы 200 сум гына. Кибетләрдәге гадәти тавыклар белән чагыштырганда, бу – арзанрак.

– Хуҗалыкта үстерелгән тавыклар бөтенләй башка инде ул, тәменә хәтле. Рәвешенә генә күз салсагыз да, бөтен нәрсә аңлашыла кебек, – дип мактый тавыкларын сатучы.