“Сабырлыкларны төенчеккә җыйнап яшәргә тырыштым”

Элемтә бүлегендә, соңрак май заводында эшләгән. Тормыш юлында авырлыкларны бик күп күргән. Бүген дә ул көннәрне әрнеп, күз яшьләре аша сөйли. 

- Кичергәннәрем бик күп. 5 яшемдә әни үлеп китте. Ярты ел да узмады, әтине дә югалттым. Дөм ятим калдым. Менә шуннан башланды инде. Тормыш күрмәгәнемне күрсәтте. Ябалакта әнинең сеңелесендә үстем. Әнине гомер буе сагындым. Анда елый-елый килгәннәрем исемдә. Тормышның катлаулы чорына ятимлек тә өстәлде. Үлән, черек бәрәңге ашадык. Кеченә йөрәгебез барын да күрде. Сугыш чоры балалары бит без, - ди әби. 
Ятимлек, сугыш чоры авырлыклары нәтиҗәсендә, Асия әбигә укырга да насып булмый. Хәтта мәктәпнең бусагасын да атлап керә алмаган ул. 

- Укый-яза белмим. Кирәк булгач кул куярга өйрәндем. Хезмәттә сынатмадым. 15 яшемнән торф чыгару эшенә җибәрделәр. Анда 11 ай эшләп кайттым. Казанга да китеп карадым. Тик авыл үзенә тартты. 42 ел стажым бар. 15 ел ике хезмәтне берьюлы алып бардым. Оператор да, каравылчы да булдым, - дип үткәннәр йомгагын сүтә Асия апа. 

Тормыш иптәше белән 32 ел парлы гомер итә алар. 5 бала үстерәләр. Ләкин ни кызганыч, язмыш Асия апаны бала хәсрәтләре белән дә сыный. Өч баласын вакытсыз югалткан ул. Хәсрәтләрне, авырлыкларны күп күрсә дә, Асия әби төшенкелекләргә бирелми. Бүген дә әле хуҗалыгында тавыклар асрый, ашарына әзерли, хәтта камыр ризыкларына кадәр пешерә. Тормышны яратып, матурлыкларны бәяләп яши. Укый-яза белмәсә дә, зиһене әйбәт, догаларын өйрәнгән, ил-көн яңалыкларыннан да хәбәрдар.

- Бер балам кечкенәдән күз тиеп үлде. Улымны 43 яшендә, кызымны 60 яшендә югалттым. Лаеклы ялга чыгу белән ирем дә гүр иясе булды. Сабырлыкларны төенчеккә җыйнап яшәргә тырыштым. Тормыш мине шулай өйрәтте, - ди Асия әби. 

Асия әбине балалары, килене гел ярдәм итеп, хөрмәтләп тора. Аларга рәхмәтләр укып, канәгать булып гомер итә ул.
- Тормышым әйбәт, Аллага шөкер. Мин бу тормышны үзем кордым. Эшләдем, чаптым һәм таптым. Әле дә тик торасым килми. Күзләрем генә начаррак күрә башлады. Аллаһы Тәгалә гомеремне, тынычлыгымны бирде. Балаларым эшлиләр, булышалар, - ди ул. 

- Әлеге йортка килен булып килгәнемә 7 ел. Тыныч, тату яшибез. Аерым яшәсәк тә, гел килеп йөрибез. Әнине яшәргә чакырсак та, үз нигезен ташлап күчәсе килми. Бик акыллы, сабыр, тырыш хатын-кыз ул. Без килешкә әле дә камыр ризыклары пешереп оеп куя, - ди килене Фәридә Шәрәфиева.

Ләйлә Шиһабиева