“Шәһри Казан”ны укучыбыз җылы юрганлы булды

Шундый ук җылы юрганнар оту бәхетенә республикабызның төрле районнарында яшәүчеләр иреште.

Тантананың иң көтелгән мизгелләре, затлы бүләкләр – биш смартфон уйнату иде. Аларга Әлки районынннан - Гөлсинә Галиуллина, Апас районыннан - Раилә Шәвәлиева, Балтач районыннан  - Эльвина Иванова, Актаныштан - Фәнзилә Шәйхетдинова, Сабадан Розалия Мөхәммәдиева лаек булды. Җиңүчеләрнең һәммәсе дә диярлек “Татмедиа” оештырган әлеге чарада ел саен катнашып килүен искәртте оештыручлар.

Лотерея уенында катнашучылар арасында Казаннан пенсионер, отставкадагы хәрби Әнвәр ага Гыйниятуллин да бар иде. Әнвәр әфәнде “Шәһри Казан”ның күптәнге тугры дусты, газетабызны аның беренче көннәреннән үк яздырып ала. Ул гына да түгел, язылу кампаниясе вакытында үз акчасына газетабызны яздыру белән дә шөгыльләнә. Питрәчтәге картлар йортына ун данә “Шәһри Казан” газетасын яздырып бүләк иткән ул. “Газетагыз бик ошый миңа. Халыкчан тел белән, үтемле итеп, актуаль проблемаларның асылын белеп язасыз. Газетагызны бер сулышта укып чыгам, шуңа да газетаны һәркайда мактап телгә алып, аңа язылырга өндәп йөрим”, - ди Әнвәр ага.

“Татмедиа” җәмгыяте җитәкчелеге хәбәр итүенчә, әлеге конкурс киләчәктә дә дәвам итәчәк, әбунәчеләрне җәлеп итүдә, газета-журналларга язылу кампаниясен нәтиҗәле уздыруда әлеге чараның әһәмияте зур. Без, үз чиратыбызда, җиңүчеләрне тәбрик итәбез һәм матбугат белән киләчәктә дә дус булырга чакырып калабыз.

Фотода: “Шәһри Казан” газетасына язылып, бүләк оту бәхетенә ия булган Мансур Килдиев.