Син мине ишетәсеңме? (Чукраклыкны кисәтү буенча КИҢӘШЛӘР)

Казан дәүләт медицина академиясе табиблары, галимнәр ишетмәүчеләргә шикәр диабеты, симерү, 75 яшьтән узгач, еш очрый торган авырулар хакында сөйләде, аларны кисәтү, дәвалау буенча киңәшләрен җиткерде. Без исә, Ишетү сәләтен саклау көне уңаеннан, республика медицина профилактикасы үзәгенең гигиенаны тәрбияләү һәм сәламәт яшәүне пропагандалау бүлеге җитәкчесе Ольга Неделько белән колакларны саклау турында сөйләштек.

«Җир шарында якынча 7 процент кеше ишетми. Начар ишетү, чукраклык тумыштан да килергә мөмкин», – ди табиб. Бу күп очракта нәселдәнлек, әни кешенең авырлы чакта кичергән авырулары белән бәйле икән. Шул ук вакытта колак белән бәйле кайбер авырулар да аяныч нәтиҗәләргә китерергә мөмкин. «Колак авырулары еш кына үзен сиздерми, кешенең кинәт ишетми башлавы бар. Авыруны вакытында ачыклап дәвалау тизрәк терелүгә китерә. Үз сәламәтлегебезгә карата игътибарлы булыйк», – ди Ольга Неделько.

Колак нигә начар ишетә?

Сәбәпләре

Кызылча, грипп кебек йогышлы авырулардан соң өзлегүләр;
бала карында чакта әнисенең катлаулы авыру кичерүе, авырлы чакта чамадан тыш алкоголь эчемлекләр куллануы, имгәнүе;
нәселдәнлек;
озак вакыт көчле музыка тыңлау;
колак җәрәхәтләнү;
химия курслары узу;
олыгаю;
юл һәлакәтләре нәтиҗәсе.

Билгеләре

Начар ишетә башлау;
бер сүзне кат-кат кабатлаттыру;
телевизорның, радионың тавышын катырак ачу;
тирә-юньдәгеләр бик акрын, аңлаешсыз сөйләшә дип уйлау.

Колак авыруларын кисәтү

Кеше иммунитетын ныгытырга, кызылча, кызамык, грипп кебек йогышлы авырулардан сакланырга, бу вирусларга каршы прививка ясатырга тиеш;
кирәк чакта колакчыннар куллану файдалы;
ял белән эшне дөрес аралаштыру;
колак, тамак, борын авыртканда белгеч биргән күрсәтмәләрне үтәргә кирәк, үз белдеклегең белән дәвалану куркыныч;
шәхси гигиена кагыйдәләрен үтәргә, колакны гел чистартып торырга кирәк;
көчле тавышлардан сакланырга, эш урыныгызда тавыш булганда, махсус колакчыннар кияргә киңәш ителә;
музыканы каты кычкыртып озак вакыт тыңларга ярамый, көчле тавыш яратучыларга колакларга ял бирергә кирәк;
авырганда, даруларны чамадан тыш артык куллану ишетү сәләтен киметергә мөмкин;
ярты елга бер тапкыр колак табибы – отоларингологка барырга кирәк, шулай ук неврологларга күренү дә комачау итми, ишетмәүнең неврология белән бәйле булуы да бар.