Суларга акты телефон, еламый түзиммени?

Телефон заманасы җитү белән, ире, хатыны, баласы-чагасы дигәндәй, сәмәнне чамалап, телефон алып җибәрделәр. Иң беренче кесә телефоннары гади, кечкенә, ләкин чыдам булып чыктылар. Шамил дә алды ул телефонны. Кош тоткандай йөри ир. Уйлап җиткермәве аркасындамы, әрәм дә итте ул аны. Кое суы карарга дип иелгән дә, күкрәк кесәсендәге телефоны кое төбенә чумган. Беренче тапкыр суны карарга коега иелгәч, күкрәк кесәсеннән шөрепләр коелган бит инде, телефонның да төшәсе көн кебек ачык – алып куярга гына кирәк иде. Юк, шул хут белән тагын иелгән. Ярар, ахыры хәерле булсын, күпмедер вакыттан соң хатын, зарлана-зарлана, болай да сай гаилә янчыгын кага-кага, тагын бер телефон алып бирә. Монысы да суларга төшә – әле кая диген – бакчаны матурлар өчен нәни ләгәнгә су салып уенчык үрдәк бәпкәләре җибәргән булганнар. Ләгән яныннан кулын катырак селкеп китә – монысы уенчык үрдәк бәпкәсенең нәкъ түбәсенә төшә дә, бәпкә телефон белән суга ава. Сөйләшеп бетергәч, телефоныңны чалбар кесәсенә салып куй бит инде. Менә шулай ике телефонга ясин чыктылар болар.

Өченчесен кызы бүләк итте. Үзенекен, сенсорныйны. Кызы үзенә яңаракны – текәрәкне алды. Функцияләре күп, сыйфатлы фото, видео ясап була торган сенсорлы телефонны бер атна да куллана алмады. Юл уртасында барлыкка килгән чыпчык тезе тирәнлегендә гөрләвек аша сикереп чыкканда, телефон суга төшеп китә. Шамил аны сизми дә. Күпмедер вакыт узгач кына телефоны искә төшә, су эченнән табып ала ачык авыз инде эшкә яраксыз телефонын.

Дүртенчесе суларга акмады, ләкин әҗәле барыбер «почти судан» булган телефонның. Бөерләре авырта башлагач, хастаханәгә барган. Иртәнге бәвел анализын бирергә кушканнар. Банка тулы бәвелне һәм телефонны пакетка салып, ир хастаханәгә киткән. Билгеле инде, банкадагы бәвел телефон өстенә түгелгән, экранга бәвел тулган. Ир телефонын кулына алганда, тончыгып азапланган телефон соңгы сулышын алган.

Әле бу язманы бәйгегә әзерләгәндә интернетта телефоннар турында сеп-свежий яңалык яздылар. Әлеге дә баягы бик башлы япун халкы «Бабушкофон» уйлап тапкан. Эчтәлеге түбәндәгедән гыйбарәт: олылар өчен уйлап чыгарылган телефоннарның хәрефләре, саннары эре, кнопкалары яктыртыла. Зур, төсле экраны бар. «Экстренный вызов» кнопкасы бик җиңел табыла ди. Кемгәдер шылтыраткач, алучы булмаса, чакыру автомат рәвештә тагын биш кешегә китә. Тагын бер уңайлы ягы: телефонга ишетү аппараты көйләп була. Зарядкасы бик озакка җитә ди. Мин моны ни өчен язам: тиз арада «папафон», «мужфон» уйлап тапмаслар микән? Әллә япун ирләре аяк өсте йоклап йөрми микән? Бишенчесенең куллану вакыты чыгып бара. «Папафон»нарны бәлки әҗәл авызыннан җиңел генә тартып алып була торгандыр. Бәхете суларга акканчы димен...

Каләмгөл, Адресым, исемем редакция өчен генә.

Фото: appsnew.ru