"Татарча диктант": «5»ле алмасам, оят!

Казаныбызда бик күп урыннарда узды әлеге чара. Шәхсән мин Казан мэриясендә язу бәхетенә ирештем. «Акция татар теле буенча белемнәрне тикшерүне максат итеп куйса да, безнең очракта, татар телен яклау, саклау, үз позициябезне күрсәтү дә булып тора», – дип чарага килгән һәр катнашучыга рәхмәт сүзләрен җиткерде Казан башкарма комитеты җитәкчесенең урынбасары Гүзәл Сәгыйтова. Оештыручылар тарафыннан тәкъдим ителгән Гомәр Бәшировның «Чишмә моңы ничек җыр булды?» текстын укыды.

Әйтергә кирәк, акцияне оештыручылар Татарстан һәм Башкортстан Республикасы катнашучылары өчен катлаулырак текст сайланды, дигән иде. Шәхсән, минем өчен текст җиңел булды. Ләкин акциягә килгәндә үк, имтихан бирергә барган укучы кебек, бераз каушадым. Уйларымда кагыйдәләрне кабатладым. Журналист башың белән, укытучы дипломы була торып та, хаталы язсам, нинди оят! Әйе, билгеләрне без үзебез генә күрә алачакбыз. Бер айдан билгеле була алар. Ләкин үземнең алда ничек оят бит! Кайбер дусларым: «Бу диктант язу сиңа нәрсә бирә инде?» дигән мәгънәсез сорау белән аптыратты. Менә шушы акциядә катнашкач, күңелем тынычланып кала, татар телен үстерүгә өлеш кертә алуым белән горурланам, дигән җавабымны ишеткәч, көлеп куялар. Әйе, «5»ле билгесе алгач, балаларча сөенәм дә әле мин.

Бу юлы да яхшы билгегә өметләнәм. Хата калдырмыйча, матур итеп язарга тырыштым. Бармаклар тәмам компьютер белән телефон клавиатурасына ияләшеп беткән, хәтта, урыны белән, Гүзәл ханымның акрын гына укуына да җитешмәделәр. Елга бер булса да, кулга каләм алып, диктант язарга мөмкинлек биргән, уй-хыялларда мәктәп партасы артына кайтарткан шушы акцияне оештыручыларга мин дә рәхмәтемне җиткерәм. Кайберәүләр татар телен диктант язып кына саклап калып булса иде, дип янмаган учакка утын өстәр. Ә сез килегез, катнашыгыз, шундый күркәм идеяләрне хуплап, күтәреп алыгыз! Менә шул чакта телебезнең киләчәген чынлап та кайгыртуыгыз күренер!

Фото: kzn.ru