Тәрәз төбем саен кыяр үсә

Ул безгә өйдә кыяр үстерү серләре турында сөйләде.

Аның әйтүенчә, кыярның нинди сорт булуы да зур роль уйный. Бакчачы үзе “Кураж” һәм “Маша” дигән сортларны утырта. Аларны ачык грунтта да, теплицада да үстереп була, ди ул. Өйдә һава температурасы 20 градустан да ким булмасын икән. Кыяр үсентеләрен көньяк, көньяк-көнбатыш һәм көньяк-көнчыгыш якка караган тәрәзә төбенә утырту дөрес. Шулай ук кыяр үсентесе үтәли җилне дә яратмый. Өстәмә яктылык та кирәк, Лариса Васильевна фитолампа куллана.

– Орлыкларны гыйнвар ахырында чәчәм. Грунтны кибеттән сатып алам һәм аңа биогумус, ягъни черемә, бераз гына уңдырышлы бакча туфрагы һәм иләнгән көл кушам. Үсентеләр үсәргә тиеш чүлмәкләр 5 литрдан ким булмасын. Моның өчен пластик шешләрне дә кулланырга була. Аларның өске өлешен кисеп аласың, ә аскы ягына тишекләр ясыйсың. Чүлмәк төбенә чуерташ куеп калдырам. Беренче яфрагы барлыкка килгәч, атнага бер тапкыр калий гуматы белән тукландырам. Күрсәтелгән дозаның яртысын гына кулланам. Үсенте үсеп киткәч, терәк куясы була. Орлыклар тишелеп чыгып ай ярым үткәч, беренче кыярлардан авыз да итәргә була. Безнең март уртасында ук беренче биш кыяр өлгерде, – ди бакчачы Лариса Каприна.  

Газета укучыбыз Розалия Ибраһимова да быел тәрәзә төбендә кыяр үстереп караган. Ул да "Кураж" сортын утырткан. Март башында утырткан идем, бик тиз тишелделәр, кыяры да күп булды, ди ул.