Түбән Камадагы фаҗигадә 27 яшьлек янгын сүндерүче һәлак булган

Бу хакта Россия гадәттән тыш хәлләр министрлыгы хәбәр итә.

Фаҗига 31 мартта килеп чыкты. Һәлакәт урынына дежур каравыл составында килеп җиткән Марат Нәҗипов кичекмәстән янгын сүндерү һәм кешеләрне коткару эшләренә керешкән. Әмма шул вакытта кинәт шартлау яңгыраган. 27 яшьлек янгын сүндерүче фаҗигадә һәлак булган. 

Шулай ук вакыйга урынында эшләгәндә тагын өч янгын сүндерүче зыян күргән. Аларга медицина ярдәме күрсәтелә.

Марат Нәҗипов хезмәт юлын 2021 елда, Түбән Кама политехник көллиятен тәмамлаганнан соң, рядовой янгын сүндерүче буларак башлаган. 2024 елда ул бүлек командиры вазифасына күтәрелгән.

Хезмәттәшләре аны югары дәрәҗәдәге профессионал, курку белмәс һәм һәрчак ярдәмгә әзер кеше буларак искә ала. Яшь булуына карамастан, ул берничә тапкыр бүләкләнгән, 2024 ел нәтиҗәләре буенча отрядның Мактау тактасына кертелгән.

Россия гадәттән тыш хәлләр министрлыгы Марат Нәҗиповның туганнары һәм якыннарының тирән кайгысын уртаклаша.

Аның турындагы якты истәлек аны белгән һәркемнең йөрәгендә сакланачак.