Түбәтәйләр генә димәгез! Фәния нинди могҗизалар тудыра?

Бу юлы ул мине гаҗәеп калфак-түбәтәйләре, алкалары белән җәлеп итте. Теләчедә яшәүче Фәния Галимҗанованың иҗат эшләрен күреп, кабат сокландык.

Үзенең студиясе ачып, заказлар ала башлый

— Яраткан эшемне башкарам. Милли түбәтәй-калфаклар чигәм. Элек мондыйны әбиләребез эшләгән. Бәрхет тукымага бисер белән чиккәннәр. Эчләре шулай тукыма белән тегелгән. Барысы да кулдан эшләнә. Хәзерге вакытта яшьләр өчен аерым төрле түбәтәйләр эшли башладым. Элеккеге фасоннар яшьләргә бик бармый. Формасын үзем ясыйм.

Бисер белән чигелгән бу баш киемнәре кәттәҗи дип атала. Бик яратып алалар. Аннан мин алъяпкычлар, футболкалар әзерли башладым. Аларны тегәм-чигәм, төрле милли бизәкләр төшерәм. Болар — машина белән чигелгән алъяпкычлар. Читләрен дә тегү машинасы белән эшлим. Максатым — милли алъяпкычлар әзерләү, — дип сөйли Фәния ханым. 

Шулай итеп Фәния үзенең күптәнге хыялына ирешә. Үзенең студиясе ачып, заказлар ала башлый.

— Студиядә минем тегү машинам да, чигә торганы да бар. Халык та шунда йөрергә өйрәнде. Мин бу эшләрне бала вакыттан бирле башкара идем. Үземә хәтта күлмәкләр тектем. Күз хәтерем яхшы. Берәр нәрсә карыйм да, шунда ук исемдә калдырам. Өйгә кайткач схемасын сызып, шундый ук итеп тегәм. Үзем дә соклана идем. Ул вакытларда ук пиджакларга орнаментларны элеккеге кара кул машинасы белән төшерә идем. Кулым белән чигеп эшләгән чакларым да булды. Хәзер милли алкалар, брошкалар, муенсалар да ясыйм. Бу эшләрне дә бик яратып эшлим, — дип сөйли кул остасы. 

Балалар үскән чорда беркадәр кул эшләреннән читләшеп тә торырга туры килә. Бу чорда балаларга киемнәр дә тегеп кидертә. 

— Кул эшләреннән туктап ук торып булмый. Бу чорда да тектем, чиктем. Ыргаклар белән дә үрдем. Балалар үскәннән соң, тагын кабат эшкә тотындым, — дип сөйли Фәния ханым. 

Ә хыяллары зур була аның

Фәниянең үзләренең районында милли бизәкләр төшерелгән кул эшләнмәләре, киемнәр җитештерү уе була. Ниһаять, андый мөмкинлекне дә кулдан ычкындырмый ул.

— Миллилекне арттырырга, миллилекне күрсәтергә кирәк. Балалар иҗат үзәгендә өстәмә белем бирү педагогы булып эшлим. Балаларга нәкъ үзем белгәннәрне өйрәтәм. Студиядә исә төрле мастер-класслар оештырабыз. Калфак тегү буенча бик яратып уздырам.

Коллектив белән килүчеләр күп. Өлкәннәр көненә, укытучылар көненә бушлай мастер-класслар да үткәрәм мин. Кәрҗиннәр үрү буенча да очрашабыз, — ди күрсәтә ул үзенең студиясен.

Моннан 3 ел элек ачылган студия — бүген Фәниянең яраткан эш урыны. Биредә аның дөньясы. Нәкъ менә күңеле кушканча эшли алуы үзенә дә чиксез рәхәтлек бирә аның.