Ялга баргач тешегезне яматып кайтырга онытмагыз

Бу төр туризм бар дөньяда популяр. Безнең ил халкы, нигездә, проблемаларсыз һәм бюрократиясез чыга торган илләрне өстен күрә. Бу –  Белоруссия, Төркия һәм, ни гаҗәп, Кытай (беренче чиратта анда Приморье һәм Байкал аръягы халкы бара). 

Ә чит илләргә сәяхәт итү мөмкинлеге яки вакыты булмаган кешеләр кечкенәрәк шәһәр һәм район үзәкләрен сайлый. Әгәр элек зур шәһәрләрдә генә яхшы белгечләр һәм  җиһазлар табарга мөмкин булса, хәзер теләсә кайсы өлкә үзәгендә башкала стандартларыннан бер дә ким булмаган клиникалар табылачак.
Теш дәвалау өчен еш сайлана торган шәһәрләр: Тверь, Краснодар, Новосибирск, Тула, Волгоград, Рязань, Омск, Смоленск, Архангельск, Хабаровск. Кызганыч, Казан бу исемлектә юк...

Эш ничек оештырыла?
Еш кына мондый турларны махсус фирмалар, яки даими рәвештә яңа пациентларны җәлеп итәргә теләгән клиникалар үзләре оештыра.
Сез тикшерү нәтиҗәсен (мәсәлән, теш казнасының панорамлы сурәте, җирле стоматолог бәяләмәсе һәм башкаларны) алдан юллыйсыз. Клиника, шуңа нигезләнеп, дәвалауның якынча бәясен санап чыгара. Аңа трансфер, яшәү һәм күңел ачу чаралары бәясе өстәлә. Түләүне башкаргач, чемоданнарны гына җыясы кала. 

Теш туризмының уңай яклары:

1.    Сәяхәт. 
Көндез теш табибында куркып утырсагыз, кичен кая да булса бару уе сезне, һичшиксез, тынычландырачак. Сез яңа кешеләр, урыннар белән танышачаксыз, белем тупларсыз.

2. Экономия.
Әйе, бу факт. Әлеге сәяхәтнең асылы шуннан гыйбарәт тә. Зур башкала үзәкләрендә дәвалау бәясе күпкә арзан. Бу аренданың түбән бәясе һәм белгечләрнең азрак хезмәт хакы алуы  белән бәйле. 
Шуны онытмагыз, җитди экономия турында проблема катлаулы һәм комплекслы булган очракта гына сөйләргә мөмкин. Мәсәлән, вакытлыча пломба куйдыру өчен генә йөрүнең мәгънәсе юк. 

3. Тизлек.
Сезнең чит җирдән килүегез табибларга кыска вакытта күп эшне башкару мөмкинлеген бирә. Сезнең сабыр булуыгыз гына кирәк. Чөнки көне буе креслода утыру җиңел түгел.
Әлеге сәяхәт ничек кенә кызыктырса да, барысын да яхшылап уйлагыз. Клиника еракта булу сәбәпле, сез анда теләсә кайсы вакытта мөрәҗәгать итә алмыйсыз. Беренче чиратта, сез сайлаган клиниканың рейтингын белешегез. Аның өчен махсус порталлар бар. Бөтенләй дә очсыз бәяләр тәкъдим итсәләр, кызыкмагыз. Бушлай сырның нинди булуын яхшы беләбез. Сезне дәвалаучы табибның лицензиясе барлыгын карагыз. Шулай ук тәкъдим ителгән килешүне алдан игътибар белән укыгыз.

Гомумән, стоматология туризмына мөрәҗәгать итәргә кирәкме? Әгәр сез сәяхәт итәргә яратасыз икән, нишләп сайламаска?! Иң мөһиме – җентекләп әзерләнергә, клиниканы дөрес сайларга һәм бюджетны дөрес планлаштырырга кирәк.

Лилия Яфизова.
Фото: https://freepik.com