Җәйгесе кышны «яратмый!»

Автомобильләргә кышкы тәгәрмәчләр кую белән генә эш бетми әле.
- Кышка күчеш чорында аеруча солярка ягулыгына сак һәм таләпчән карарга кирәк. Кайбер эшкуарлар солярканың җәйге белән кышкы төрләрен кушып, “бар сезонга яраклы” ягулык сыйфатында сата. Җәйге солярка 5 градус салкында кристаллаша, двигательгә ягулык килми башлый. Димәк, двигатель кабынмаячак, - дип кисәтте “Татарстан Республикасында ягулык-энергетика чыганакларының сыйфатын һәм нәтиҗәле кулланышын тәэмин итү буенча идарә” дәүләт бюджет учреждениесе җитәкчесе урынбасары Шамил Гомәров.

Татарстанда 29 октябрьдән ягулыкның сыйфатын тикшерү буенча айлык бара. Бүгенгә 340 АЗСтан 450 проба алынган. Шуның 260ы лабораториядә тикшерү узган. Төрле АЗСлардан алынган 7 пробада ягулыкның тиешле стандартлардан түбәнрәк дәрәҗәдә булуы ачыкланган. Ягъни, бензинда күкерт тиешле нормалардан күбрәк.

- Сыйфаты түбән булган ягулык сатучы АЗС күз уңына алына, анда кабат анализ үткәрелә. Кимчелекләр дәвам итсә, эш прокуратурага тапшырыла. Андыйлар 500 мең сум штрафка тартыла, - диде Шамил Гомәров.

Журналистлар катнашында “Татнефть” җәмгыятенең дә Казандагы бер станциясеннән бензин тикшерүгә алынды.

- Республика күләмендәге бу чараны аңлап кабул итәбез, чөнки “Татнефть” үзе дә продукциянең югары сыйфаты өчен тырыша. Дүрт лабораториябез бар, АЗСлар челтәрендәге ягулыкны үзебез дә ай саен җентекләп тикшереп торабыз. Татарстандагы гына түгел, ә күрше-тирә республикалардагы һәм өлкәләрдәге АЗСлар да күзәтчелектә тотыла, - диде “Татнефть-АЗС үзәк” җаваплылыгы чикләнгән җәмгыятьнең Казан филиалы сыйфат инженеры Руслан Фәттахов.

Автор фотолары