Зифа Нагаева: "Җырчылар җырларыма лаеклы бәя түли"

– Ике республикага да кирәкле икәнлегеңне белү зур бәхет. Авылдагы кечкенә сәхнә булса да, купшы зур сәхнә булса да, аерма юк дип саныйм. Ул барыбер сәхнә булып кала бирә, чөнки кайда да син һәм тамашачылар тора. Ә Казанда минем җырларымны танып белүчеләр бик күп. Җырларым шулкадәрле күп ки, хәтта мин аларның исәбен дә белмим. Бер утырып санарга кирәк әле. Саны гына түгел, сыйфаты да бар җырларымның. Сыйфаты булмаса, зур чараларда яңгырамас, бүләкләнмәс, төрле номинацияләрдә җиңү яуламаслар иде.

–Җырларыгызны күңелегезгә ятмаган җырчылар башкарган очраклар бармы, Зифа ханым?

–Бар. Продюсерлар теге яки бу җырчыга алып биргән вакытларда зур өметләр баглаган җырларымның канатлары сынып калганнары бар. Аннан соң шактый вакыттан соң кабат чыгарып, популяр булып киткәннәре бар. Башкортстанда яшь җырчыларга ярдәм итәргә теләп, йөрәктән өзеп бирәсең, ләкин җырның гомере кыска була. Ләкин үсеп кенә килә торган җырчы сиңа күз төбәп, өметләнеп килә икән, аның да күңелен китәсе килми. Ә бит җыр бөтен җырчыга бертөрле языла. “Монысы яшь, ярамаган тагын”, - дип эшләп булмый бит. Барлык иҗат әсәрләрем дә балаларым кебек.

–Җырларыгызны җырчыларга сатып бирәсезме?

–Әлбәттә. Без, авторлар, хәзер күбебез Авторлар җәмгыятендә торабыз. Бәяне тиешенчә алабыз дип әйтеп булмый, тик алай да үкенечле түгел. Хәзер күпләр безнең иҗатны кәсепкә әйләнде, дип әйтә. Юк, кәсеп түгел. Әгәр син кирәкле кеше икәнсең, аның нәтиҗәсе дә булырга тиеш. Идән юучыга да, тегүчегә дә тыршып, арттырып эшләгәне өчен өстәмә акча бирәләр бит. Без дә шундый ук кешеләр. Әгәр инде мөмкинлек булса, индивидуаль рәвештә ярдәм итәргә тырышам. Бәянең күләменә килгәндә, җырчыга карап карар кылган вакытларым да бар. Түләү мәсьәләсендә мин үпкәли алмыйм, әлбәттә. Җырчылар мине бу яктан белеп бетергәннәр инде. “Бушка гына бир әле”, - дип килүчеләр юк дәрәҗәсендә. Мактанып та әйтә алам. Бу яктан мин бик бәхетле, чөнки җырларымның кайтавазы миңа килеп җитә. Һәм җырчы баскыч-баскыч күтәрелә. Бу турыда җырчылар үзләре дә әйтә. Аның калдырып киткән бәясе җырчының дәрәҗәсен арттыра икән, ул кабат миңа килә. Һәм шулай итеп, даими эшли торган җырчыларым барлыкка килә. 

фото - vk.com/zifa_nagaeva