«Ана капиталы дип кенә тапкан иде»

Урамда келәм кагып йөрим. Комлыкта балалар уйнап утыра. Кинәт 3 яшь ярымнар чамасындагы малайның авызында тәмәке күреп сискәнеп киттем. Якынрак килеп карасам, комда уйный торган чиләге тулы тәмәке төпчекләре. Малайның әбисен чакырдым. Дәү әнисе оныгын яхшылап шелтәләде, кулын кычытканга чагып бетерде. «Үләм инде шушы бала белән, башта ук әнисен тапмаска үгетләдем, югыйсә. Ана капиталы хакына дип кенә калдырды көмәнен, хәзер нәрсә инде менә: капиталны кулга бирмәделәр, акчасын ала алмагач, бала да кирәксезгә әйләнде. Тиешле игътибар юк бу малайга. Тәмәкене беренче генә тапкыр авызына алмый инде ул, кайчагында әтисеннән калган төпчекне суыра, тын сулышы капланып буылмасын дип куркып җаным чыга, әниләре эштә чакта мин җавап бирәм бит бу җәфа өчен», - диде дәү әни кеше.