Башка кеше кылган җинаять өчен 13 ел төрмәдә утырган ир акча таләп итә

Фәтхулла Исхаков судка 450 млн сум акча сорап шикаять белдерә, ә хөкемдар шуның 31 миллион сумын гына түләргә калдыра. . Бу хакта «Башинформ» хәбәр итә.

13 ел эчендә Фәтхулла Исхаков хатынын, әти-әнисен югалта. Баласы ятим калып 10 елдан артык әти-әнисез яшәгән. 50 елга якын вакыт дөреслекне ачыклау өчен үткән. Шуңа күрә бирелгән сумма бик аз», - дигән яклаучы Виталий Буркин. 

Шунысын да билгеләп үтәргә кирәк, пенсионер барысын да исәпләп чыгарган: 450 млн сумга ул Сочида диңгез янында йорт сатып алырга планлаштыра.

Уфада туып-үскән ирне үтерүгә омтылуда гаепләп, ирегеннән мәхрүм итүгә хөкем итәләр. Ул 13 елын колониядә үткәрә. Ир-ат үзенең гаепсез икәнлеген белдерә һәм азат ителгәннән соң дистә еллар дәвамында хөкем карарын гамәлдән чыгаруны таләп итә. Хата китүен дәлилли, тикшерүче эшләргә тиешле гамәлләрне ул үзе башкара. 2012 елда шаһитларның берсе Исхаков хөкем ителгән җинаятьне таныган. Прокурор яңа шартлар пәйда булу аркасында судка тиешле күрсәтмә җибәрә. 

Әмма җинаять эше берничә тапкыр кузгатылып, берничә тапкыр туктатыла. Реабилитациягә омтылган Исхаковның шикаятьләре буенча судлар аның фикере белән килешми, әмма нахакка гаепләнгән ир дә тиз генә бирешергә җыенмый. Суд юлларын таптый торгач, Россия Федерациясе Югары суды  25 май көнне 1959 елгы хөкем карарын гамәлдән чыгару турында карар кабул итә.

Нәтиҗәдә, суд Фәтхулла Исхаковка килгән мораль зыянны каплау өчен 31 миллион акча түләргә карар чыгара. Ир бу сумма белән канәгать түгел, бу хакта ул «Честно говоря» телепроекты журналистына хәбәр иткән.