Чишмә төзекләндерергә исәпләсәң, дәүләттән субсидия ал

—Татарстан Рәисе Рөстәм Миңнеханов һәм республика Хөкүмәте булышлыгында грантлар бүлеп бирү кимемәде, ә елдан-ел арта гына бара. СИБУР һәм “Татнефть” кебек эре компанияләр дә җәмәгать оешмаларына финанс ярдәме күрсәтә, - диде республиканың экология министры урынбасары Егор Тарнавский “Татар-информ” мәгълүмат агентлыгында узган матбугат конференциясендә.

Республика ресурс үзәге үткәргән конкурста “Будет чисто” төбәк яшьләр җәмәгать оешмасының “ЭКОмәдәният” проекты җиңү яулаган. Грант акчасына яшьләр арасында экологиягә караган интеллектуаль уеннар турниры үткәрү планлаштырыла. Татарстанның Экология һәм табигый чыганаклар министрлыгы грантын А. И. Щеповских исемендәге тирә-юнь мохитне саклауга теләктәшлек төбәк җәмәгать фонды откан. Алар әлеге акчага “Здравушка” тернәкләндерү үзәгенә табигать авазлары, кошлар сайравы чыгара торган галокамера куйган. 

— Җәмәгать оешмалары республика грантларыннан тыш, федераль программаларда да катнаша ала. Президент грантлары фонды ел саен субсидияләр алуга 2 конкурс оештыра. Россия Президенты грантын “Будет чисто” республика яшьләр хәрәкәте дә алуга иреште,- диде Егор Тарнавский.

Росмолодежь ел дәвамында 4 төрдә конкурслар үткәрә. Әлеге конкурсларның икесе җәмәгать оешмалары, ә икесе физик затлар өчен. “Будет чисто” җәмәгать оешмасының “ЭКОфест” проекты җиңгән. Казанда 12 августта Кремль яр буенда “ЭКОфест” фестивале була, программада осталык дәресләре, конкурслар һәм уеннар оештыру каралган.

— Татарстанның җәмәгать оешмалары җиңүе ул бер Казан өчен генә түгел, грант акчалары республика күләмендәге чаралар үткәрүгә тотыла. Татарстанның шәһәрләре һәм районнары Экология министрлыгы үткәрә торган грант конкурсларда актив катнашсыннар,- дип киңәш бирде Егор Тарнавский.

Федераль проект кысаларында узган ел Казансу елгасына экологик тикшерү башланган иде.
 —Казансу буенда чүпләр түгелгән һәм агачлар белән тыгылган урыннар табылды. Елганың 13 урыныннан 800 кубометр ауган агачлар чистартылды, эшләр дәвам итә,- диде Татарстан Республикасында Рус география җәмгыятенең төбәк бүлеге рәисе урынбасары Андрей Агарков.

СИБУР компаниясе гранты ярдәмендә республикада Кама Тамагы районында лачын-балобаннар үрчетелә. Бу кошлар “Кызыл китап”ка кертелгән. Лачыннар башта читлектә үстерелә, аннан иреккә җибәрелә. 

— Без тырышып үстерәбез, ә лачыннар җылы якларга, әйтик, Сочига очты да китте, ди. Лачыннар Татарстанда кышлыймы?-дип, “Шәһри Казан” газетасы исеменнән сорау бирдем.
 — Лачыннар бездә кышламый, җылы якларга китә. Ләкин, кошларның аякларына язулы балдаклар беркетелгән, орнитологлар Татарстан лачыннарын таный ала. Лачыннарыбыз яз көне туган җирләре- Татарстанга әйләнеп кайтырлар, дип өметләнәбез,- диде Андрей Агарков. 
Экология министры урынбасары Егор Тарнавский да лачыннарның санын арттыруның мөһим бурыч булуын искәртте.  
.