Ел саен грант отучы бәхетлеләр бар. Быел Баулы һәм Кукмарада эшләр гөрлиячәк

Республиканың зур калаларында яшәүчеләр дә, кечерәк шәһәрләрдә гомер итүчеләр дә бу үзгәрешләрне сизмичә калмады. 

Кайсы җирдә ташландык хәлгә калган парклар һәм скверлар яңартылды, халык өчен уңайлы ителде. Шактый гына яңа ял урыннары да барлыкка килде. Шулай ук күп кенә ишегалларын да ялт иттерделәр.

Программа гамәлдә булган 9 елда 400гә якын территория тәртипкә китерелгән. Акчаны да кызганмаганнар – барлыгы 24 млрд. сум тотылган, шуларның күп өлеше республика бюджетыннан.

-    2015 елда без иҗтимагый киңлекләрне төзекләндерү программасын гамәлгә ашыра башладык, узган 9 елда республика буенча 398 территория тәртипкә китерелде. Кайбер объектларда эшләр елдан-елга күчеп, берничә ел дәвамында башкарылды. Әлеге максатларга 24 млрд. сум юнәлтелде. Республика бюджетыннан 13,7 млрд. сум тотылды, - дип сөйләде Төзелеш, архитектура һәм торак-коммуналь хуҗалык министрының беренче урынбасары Алексей Фролов.
Әйткәнебезчә, уңайлыклар зур мегаполисларда гына түгел, район үзәкләрендә дә тудырыла. Соңгы 6 елда кече шәһәрләрдәге ял киңлекләрен төзекләндерүгә дә махсус грантлар бирелә. Алексей Фролов китергән саннар буенча, федераль үзәк бүлеп биргән грантлар хисабына муниципаль берәмлекләрдә 42 объектны тәртипкә китерүгә ирешкәннәр. Беренче елларда эш бик куәтле барган. Соңгы вакытта исә, Россиянең башка субъектлары да активлашуы нәтиҗәсендә, көндәшлек бик нык арткан. Шулай да эш тукталмый. Ел саен грант отучы бәхетлеләр бар. Быел, әйтик, Баулы һәм Кукмарада эшләр гөрлиячәк.

Иҗтимагый киңлекләрне тәртипкә китерү буенча алда торган планнар, чыннан да, зурдан. 2024 елда 64 объектта төзекләндерү эшләре ниятләнгән – бу максатларга федераль һәм республика бюджетларыннан гомуми күләмдә  2,35 млрд сум акча тотарга исәпләре бар. 

-    Конкурслар билгеләнгән, март ахырында дәүләт контрактлары төзеләчәк. Инде шуннан соң кирәкле материалларга, кече формаларга заказлар биреләчәк. Һава шартлары мөмкинлек биргәч тә, традиция буенча бу май башы, май бәйрәмнәреннән соң, барлык иҗтимагый киңлекләрдә эшләр башланачак, - диде Алексей Фролов.