Эшләп кеше үлми яки эш вакытын нигә дүрт сәгатькә кыскартырга җыеналар?!

Рамил Гарифуллин, психолог, психотерапевт:

- Кеше һәрчак эшләргә тиеш. Эш ихтыяр көчен арттыра, җанга дәва бирә. Безнең республикада чын-чынлап эшләүчеләр бик аз. Күбесе - хезмәт күрсәтүче. Әгәр минем клиентларым юк икән, димәк, эшем дә юк дигән сүз. Элек җитештерүчәнлек күләме зуррак иде, бүген күп тармаклар нефть аркасында яши. Кеше көненә ничә сәгать эшләргә тиеш дигәндә, бу һәркем өчен аерым билгеләнә. Хезмәт психологиясе дигән фән дә бар. Һәр кеше күпме эш башкарырга сәләтле икәнен үзе чамалый. Әгәр түземлеге җитми икән, ул эштән китә. Әлбәттә, ял да кирәк. Әмма бүгенге заманда, эшче һөнәрләр югала барганда, күп хезмәтне автоматлаштырылган роботлар башкарганда, кеше - күзәтүче ролендә. Эшләп арысаң гына чын хезмәт була. Кеше эшләргә теләми эшләгән шөгыль генә хезмәт дип атала. Яратып эшли икән, димәк, ул арымый, димәк, бу аның яраткан шөгыле. Бары хезмәт аркасында гына кеше ялның кадерен белергә өйрәнә. Эшләмичә ял итү - төрмәгә тиң.

Равил Миңгалиев, «Элекон» заводында 38 ел буе башкаручы директор булып эшләгән (хәзер лаеклы ялда):

- Заводта 69 ел эшләдем. Гади слесарь булып килгән идем, тора-бара зуррак дәрәҗәләргә ирештем. Яшь чакта шимбә көннәрендә дә, эштән соң калып та эшләргә туры килде. 78 яшемдә заводтан киттем. Эшләгән кеше картаймый. Эш булмагач, нишләргә белмисең, саташтыра башлый, кемдер эчүгә сабыша. Сигез сәгать эш сәгатен кыскартырга кирәк түгел дип саныйм. Эш планын да үтисе бар. Эшләмәсәң, акча да түләмиләр. Кесә юкаргач, тормыш авырлаша. Эшләп кеше үлми бит.