Ялларны ничек уздырырга?

«Не опять, а снова» – гыйнвар аенда «Казан» гаилә үзәгендә узачак яңа ел чаралары циклы шулай атала. Шәһәр халкы һәм кунаклары өчен карнавал төне, совет җырлары белән караоке, диско-кичә, балалар спектакле һәм башка күп нәрсәләр оештырыла. Бу хакта «Татар-информ» мәгълүмат агентлыгында узган матбугат конференциясендә билгеле булды.

Чаралар программасы турында шәһәр Башкарма комитетының Мәдәният идарәсе башлыгы урынбасары Эмиль Мостафин сөйләде. Ул искә төшергәнчә, 26 нчы декабрьдә «Казан» гаилә үзәге янында төп чыршы ачылды – хәзер мәйданчык яңа ел ярминкәсе режимында эшли. Үзәк территориясендә чаралар моның белән генә тәмамланмый. 31 нче декабрьдә казанлылар мәйданчыкта яңа елны каршылый алачак, ә гыйнварда шәһәрнең төп чыршысы янында тематик вакыйгалар узачак. 

«Беренче гыйнварда без совет яңа ел фильмнарын искә төшерәчәкбез һәм кинодан яраткан җырларыбызны җырлаячакбыз. Икенче гыйнварда «Карнавал төне» чарасы узачак, анда оригиналь жанр артистлары, шул исәптән Руслан Риманас театры чыгыш ясаячак, ә өченче гыйнварда сезне безнең белән бергә 80 нче, 90 нчы һәм 2000 нче еллар ретро-ритмына – музыкасына биергә чакырабыз», - диде спикер. 

Казан халкы яңа елны 5 нче гыйнварда татарча каршы ала алачак. Бу кичне сәхнәгә Илгиз Шәйхразиев, Malsi Music һәм башка танылган татар башкаручылары чыгачак. Балалар спектаклен Тимерьюлчылар мәдәният йорты тәрбияләнүчеләре 6 нчы гыйнварда күрсәтәчәк, ә икенче көнне казанлыларны рус күңел ачуларына чакыралар. «Шәһәрнең фольклор коллективлары белән бергә без рус яңа елын каршы алачакбыз һәм әйлән-бәйлән ясаячакбыз. Ә 13 нче гыйнварда Иске Яңа елны үткәрәбез», - дип белдерде Эмиль Мостафин. Чаралар 17:00 сәгатьтә башланачак, керү ирекле. 

Татарстан башкаласы урамнары буйлап беренче тапкыр 2-5 нче гыйнварда «Аждаһаны тот» әкияти фургоны йөриячәк. Ул берничә урында пәйда булачак һәм Аждаһа белән бергә кәефне күтәрәчәк, ул уеннар үткәрәчәк һәм бүләкләр бирәчәк. Аның кайларда булачагын Мәдәният идарәсе социаль челтәрләрендә күзәтеп була. 

Казанлылар конкурста катнаша һәм шунда ук фотоны ясап бирә торган фотоаппарат отачак. Аждаһа белән фотога төшәргә һәм фотоны мәдәният идарәсе Telegram-каналында урнаштырырга кирәк булачак. Җиңүчене 6 нчы гыйнварда «Казан» гаилә үзәгендә игълан итәчәкбез», - дип уртаклашты докладчы. 

Яңа ел чаралары шулай ук шәһәр паркларында һәм скверларында узачак. Вакыйгалар арасында «Голубой огонек» концерты, балалар бәйрәмнәре, «Вечеринка в болоньевых штанишках», гаилә кышкы күңел ачулар фестивале һәм башка күп нәрсәләр. Чыршы шәһәрчекләренең бәйрәм ачылышлары иртәгә «Светлая Долина» паркында тәмамланачак, шәһәр халкын 16:00 сәгатьтә көтәчәкләр. Казанда барлыгы 115 чыршы шәһәрчеге урнаштырылган – алар паркларда һәм скверларда, торак массивларда һәм ишегалларында оештырылган, ТР башкаласының барлык районнары Яңа Ел кәефе белән сугарылган. Шәһәрдә Яңа ел бәйрәме турында өстәмә мәгълүматны KZN.RU порталының махсус бүлегендә белергә мөмкин.

kzn.ru