Пенсия бетмәгәе

Киләчәктә пенсия алу бәхете тәтемәскә дә мөмкин. Пенсиягә чыккач, рәхәтләнеп ял итәр идем, дип йөрүчеләрнең хыяллары чәлпәрәмә килмәгәе.
Россия Банкы рәисенең беренче урынбасары Алексей Улюкаев пенсия урынына социаль ярдәм буларак яшәү минимумы күләмендә (бүген ул ил буенча 4961 сумга тигез) акча гына түләргә тәкъдим итә, ягъни ул Пенсия фондын бетерергә кирәк дигән фикердә тора. Аның әйтүе буенча, бүгенге көндә хезмәт хакыннан бүлеп бирелгән акча картлык буенча пенсия түләргә җитми. Шул рәвешле Алексей Улюкаев картлык көнендә яшәргә җитәрлек акчаны алдан ук, эшләргә сәләтле вакытта ук туплап калырга куша. Ә моны булдыра алмаган өлкәннәргә аларның балалары яки оныклары ярдәм итсен, ди ул.