«Рамазан аен үткәрү өчен махсус Казанга килдем»

Ислам динен кабул иткәч, ул исемен Әхмәдкә алыштырган. Тумышы белән Уфа шәһәреннән. Аннан Кубаньда яшәгән. 2001 елда ислам динен кабул иткәч, мәчеткә, мөселманнарга якынрак булыйм дип, Краснодарга күченгән. Соңрак Адыгейга күчеп килгән. Ә Казанда аның кыз туганы яши. Ул да, аның ире дә исламда. Әхмәдкә дә дингә кереп китәргә туганы этәргеч ясаган. 

– Туганым ислам дине турында күп сөйли иде, безгә кунакка килгәч, намаз укыганын күзәтеп торганым булды. Үзе белән дини китаплар алып килә иде. Исламда барысы да төгәл, аңлаешлы, анда бу, теге ошамый дигән әйбер юк, дия иде. Ул калдырган китапларны укып чыккач, үзем дә шуңа инандым. Син бит инде яшәү рәвеше белән болай да мөселман кешесе кебек, үзеңне дин чикләр дип куркырга кирәкми, дип, туганым бу адымымны тагын да тизләтте кебек. Казанга килеп, “Борнай” мәчетендә булгач, анда мөселман кардәшләр белән танышып сөйләшкәч, үземнең дөрес юлда булуымны аңладым. Һәм бик тиздән хаҗга киттем. Хаҗдагы кичерешләрне аңлатып бетереп булмый, аннан минем китәсем дә килмәде. Бу изге сәфәр бик күп сорауларга җавап табарга, иманымны ныгытырга ярдәм итте, – дип искә ала ул.