Рөстәм Миңнеханов: «Нәтиҗәсен күрмәгәч шуның кадәр акча сарыф итүдән безгә ни файда?»

Президент эшче һөнәрләр чемпионаты нәтиҗәсе белән канәгать түгел
Икътисадчылар да, юристлар да баштан ашкан. Республикага эшче һөнәрләр кирәк! 2014 елдан башланган WorldSkills - эшче һөнәрләр хәрәкәте бу кытлыкны киметә алырмы? Чемпионатка әзерлек тә мактанырлык түгел. Министрлар Кабинетында һөнәри белем бирүче оешмаларның белгечләр әзерләү сыйфатын бәйсез бәяләү уздыру турындагы утырышта Татарстан Президенты Рөстәм Миңнеханов әзерлек дәрәҗәсен тәнкыйтьләп чыкты.

15-19 май көнне Красноярск шәһәрендә узган WorldSkills Russia чемпионатында Татарстан команда зачетында икенче урын алды. Без һөнәри осталык буенча бары Мәскәүдән генә калыштык. Чемпионатта барлыгы 109 юнәлеш тәкъдим ителгән иде. Республика командасы 60 һөнәр буенча көч сынашты һәм төрле дәрәҗәдәге 31 медальгә ия булды. Медаль алу - бер, шәхси зачетта һәр катнашучының баллар күрсәткече икенче әйбер икән шул. Икенчесе буенча дөнья дәрәҗәсеннән шактый артта калабыз.
- Без ресурс үзәкләре төзибез, белем бирү оешмаларын төрле яктан тәэмин итәбез. Нәтиҗәсен күрмәгәч, шуның кадәр акча сарыф итүдән ни файда? - дип риторик сорау бирде Рөстәм Миңнеханов. - Бу бит әле Россия чемпионаты гына. Безгә дөнья дәрәҗәсенә күтәрелү Кытайга җәяү барган кебек ерак әле.
Исегезгә төшерәбез, 2014 елдан эшче һөнәрләре әзерләүне дөнья дәрәҗәсенә күтәрү максатыннан, республикада 20 ресурс үзәге ачылды. Моның өчен Татарстан казнасыннан ике миллиард сумнан артык акча тотылды. Ел ахырына кадәр тагын шундый биш үзәк ачү күздә тотыла.
Үз ведомствосы эшчәнлеге буенча беренче тәнкыйть сүзләрен Президент мәгълүматлаштыру һәм элемтә министры урынбасары Дмитрий Вандюковка яудырды.
- Сезнең Казан мәгълүмати технологияләр һәм элемтә техникумы базасында урнашкан ресурс үзәге иң зур кертемлесе булды, минемчә. Без аны булдыру өчен 105 миллион сум акча сарыф иттек. Ә нәтиҗәсе? Акланмагыз! Сезнең төп проблемагыз - сүзегез күп, эшегез аз булуда. Ресурс үзәкләре дә, әзерләнгән белгечләр дә, бу эшкә оешмалар кушылмаса, берни тормый, - диде Рөстәм Миңнеханов.
Татарстанның мәгариф һәм фән министры Энгель Фәттахов сүзләренчә, эшче һөнәрләрен әзерләүгә кушылмаучы предприятиеләр дә шактый икән. Гәрчә соңыннан бу эшчеләр аларга килсә дә. Ләкин күп компетенцияләр бүген аерым бер министрлыкка карый. Мисал өчен, шул ук Мәгълүматлаштыру һәм элемтә министрлыгына тугыз компетенция беркетелгән. Өчесе буенча республика призлы урыннар алды. Шулар арасында бер алтын һәм бер «Осталык өчен» медале дә бар. Республиканың Сәнәгать һәм сәүдә министрлыгы карамагында булган 21 компетенциядә өч алтын медаль, биш призлы урын һәм бер «Осталык өчен» медале яуланган. Сәламәтлек саклау министрлыгы җитәкчелегендә эшләгән өч компетенциянең икесе республикага алтын медаль алып килгән.