Сакланганны – Ходай саклый

Әгәр идарәнең бүгенге эшен Советлар Союзы чорының алтмышынчы еллары белән чагыштырсак, җир белән күк аермасы. Еллар узган, заманалар үзгәргән саен, Ведомстводан тыш сак идарәсенең дә эшчәнлегенә зур үзгәрешләр керә бара. Транспорт, заманча компьютер техникасы, төрле төрдәге сигнализация, мәгълүмати технологияләр... Бүгенге көндә идарәнең Татарстан район үзәкләрендә, республикабызның зур шәһәрләрендә барлыгы утыз бүлеге бар. Хәзерге вакытта кырык меңнән артык фатир һәм унөч меңнән артык башка төрдәге объектлар Ведомстводан тыш сак идарәсе тарафыннан саклана.
Татарстан Республикасы буенча Эчке эшләр министрлыгының Ведомстводан тыш сак идарәсендә булып үткән брифингта идарә җитәкчесе полковник Марат Шакиров: «Халык, караклардан кала - янгыннан калмый, дип әйтергә яратса да, фатирыңны басып чыгып китсәләр, бер дә күңелле хәл түгел. Шуңа күрә, безнең максат-бурычыбыз - дәүләт объектларын һәм гражданнарның шәхси милекләрен саклау. Без саклый торган фатирлар сигнализациягә тоташтырылган, калган объектларда да махсус пультлар бар. Гомумән, без идарәдә техника өлкәсендәге яңалыкларга зур игътибар бирәбез. Чөнки алар ярдәмендә ел саен йөздән артык урлау-талау очрагы булдырылмый кала, угрылар кайнар эздән кулга алына», - дип белдерде.