Татарстанда Яшьләр елы игълан итәргә тәкъдим ителде

— Шуңа күрә, хөрмәтле депутатлар, 2024 елга һәм аннан соңгы елларга Татарстан бюджетын карау нигизендә, без сезнең ярдәмегезгә өметләнеп калабыз, - дип белдерде Татарстанның яшьләр эшләре министры Ринат Садыйков  алтынчы чакырылыш Татарстан Дәүләт Советының 44 утырышында.

Яшьләр министры утырышта Татарстан территориясендә яшьләр сәясәтен гамәлгә ашыру барышы турында Татарстан Министрлар Кабинеты доклады белән чыгыш ясады. Аның сүзләренчә, яшьләрдә эшмәкәрлекне үстерүгә аерым игътибар итәргә җыеналар.

—  Авыл хуҗалыгы министрлыгы һәм Игътисад министрлыгы белән берлектә «Авыл яшьләре» программасының яңа редакциясе эшләнелде. Әлеге программа белән эшләү барышында бүгенге демографик хәл, миграцион процесслар һәм яшь гаиләләрнең аерылышу очраклары исәпкә алынды. Авыл яшьләренә чын мәгънәсендә төрле яклап ярдәм күрсәтү өчен финанс ягының җитәрлек булмавын аңлыйбыз. Эшмәкәрлекне үстерүгә аерым игътибар бирергә ниятләнә. Авыл җирлеге өчен бу үсеш ноктасы – эш урыннары булдыру һәм тотрыклы хезмәт хакы алу өчен бик аз мөмкинлекләрнең берсе булуын аңлыйбыз, - диде ул. 

Яшьләр өлкәсендәге икенче бер проблеманы да атады. Фәннәр академиясенең гаилә һәм демография үзәге фаразлары буенча, 2028 елга республикада яшьләрнең саны 100 меңгә кимиячәк. 

—  Гаиләне ныгыту, яшьләр арасында традицион кыйммәтләрне булдыру - министрлыкның өстенлекле эш юнәлеше булырга тиеш. Бу факторлар безне яшь гаилә һәм гаилә кыйммәтләре институтын үстерү буенча яңа республика ведомствоара программасы проектын эшләргә этәрде, - диде чыгыш ясаучы.

Соңгы биш елда республикада, дәүләт программалары ярдәмендә, 2,5 мең яшь гаилә торак шартларын яхшырткан. 
— Яшьләр белән эшләүдә тиз нәтиҗәләр булмый. Яңа шартлар бездән яңа алымнар таләп итә. Чыгышымны тәмамлап, шуны әйтергә телим: хәзерге дөнья шартларында без яшьләрнең фәлсәфәсен үзгәртергә, аларны тагын да файдалырак, җаваплырак итәргә кирәк. Бу безнең программаларны һәм проектларны яңа эчтәлек, яңа кыйммәтләр белән тутыру аша мөмкин булачак, - дип, министр Татарстанда Яшьләр елын игълан итәргә тәкъдим итте.