Җырлап чыгабыз иртән... Белоруссиядә

Республика Мәдәният министрлыгының матбугат хезмәте хәбәр иткәнчә, чара кысаларында күргәзмәләр эшли, Татарстан артистлары концертлар куя, “Халык кул эшләнмәләрен үстерү өчен шартлар тудыру” темасына түгәрәк өстәл үткәрелә.

Сәнгать осталары концертларында республиканың атказанган сәнгать эшлеклесе Миләүшә Таминдарова җитәкчелегендәге Татарстан Дәүләт камера хоры, Татарстанның Дәүләт фольклор музыка ансамбле, “Казан нуры” халык уен кораллары оркестры катнаша. Халык иҗаты учреждениеләре җитәкчеләренең очрашуы була, Татарстан Республикасы Милли музее белән Белоруссия Республикасы Милли тарихи музее арасында хезмәттәшлек килешүе имзалана. Белоруссиянең Милли китапханәсенә Татарстанның тарихы, мәдәнияте һәм сәнгате турындагы китап тапшырыла.

Узган ел Казан Россиядә Белоруссия Республикасы мәдәнияты көннәре эстафетасын кабул иткән иде. Ул вакытта Белоруссиянең сәнгать осталары концертлар куйды, предприятиеләрнең һәм беларусь рәссамнарының күргәзмәләре эшләде. 2022 елның августында Белоруссия Республикасы мәдәнияты көннәре Мәскәү, Йошкар-Ола һәм Казан шәһәрләрендә барды. 

Дилбәр Садыйкова, Яшьләр дипломатиясе академиясен оештыручы һәм директоры:

- Белоруссия Республикасы белән дәүләт, шулай ук төбәкара һәм җәмәгатьчелек дәрәҗәсендәге мөнәсәбәтләр өстенлекле эшчәнлек юнәлеше булып тора. Белоруссиянең Россиядәге илчелегенең Татарстанда Казан бүлекчәсе дә эшли. Белоруссиядәге ватандашларыбыз бездә белем ала. Күптән түгел генә безнең тарафтан Яшь дипломатларның глобаль форумы һәм Казан глобаль яшьләр саммиты уздырылды. Белоруссия яшьләре вәкилләре – иң зур делегацияләрнең берсе иде. Бу ике якның да күпкырлы хезмәттәшлекне үстерүгә омтылышын дәлилли.

Белоруссиядә Татарстан мәдәнияте көннәре үткәрелүе дә – дуслыкны ныгытудагы матур чара.