91 яшьлек десантчы Павел Клетнев: «Күккә күтәрелгәч яшәрәм»

Павел Кузьмичка Ленинград блокадасында, Бөек Ватан сугышында, Венгрия өчен көрәштә дә катнашырга туры килгән. Кыскасы, сугыш михнәтен, ачлык, ялангачлыкны үз җилкәсендә татыган ул. Начар ишетүе дә сугыш «бүләге». Ветеран белән аңлашу авыррак булганга, очыш үзенчәлекләрен аның белән бергә парашюттан сикергән офицер Тәлгать Камалеевтан сораштык.
Павел ага сикергән рекордлы 4000 метр биеклектән хәтта яшьләр дә "очарга" кыймый икән. Сәгатенә 200 километр тизлек, 70 секунд бернинди парашютсыз кош кебек ирекле очыш. Бу Павел Кузьмичның алтынчы тапкыр сикерүе.

Сугыш вакытында 1943 елда ике тапкыр парашют белән сикерергә туры килгән аңа. Бары 87 яшенә җиткәч кенә, шактый еллардан соң, кабат күккә күтәрелергә тәвәкәлләгән. Һава десант гаскәрләренең юбилей бәйрәменә 2012 елның 1 августында 1500 метр биеклектән сикергән. Былтыр исә Павел Плетнев ике тапкыр "очарга" өлгергән. Бер очышын Бөек Җиңүнең 70 еллыгына багышлаган. Ул вакытта ук ветеран: "Сәламәтлегем рөхсәт итсә, Бөек Җиңү көне уңаеннан тагын сикерәм әле", - дип әйтеп куйган булган. Сүзләре чынга ашкан. Бәйрәмне көтеп тормыйча, узган шимбәдә үк очыш ясады. Аның белән гел бергә сикерә торган оныгы быел авырлы икән, шуңа да Павел ага иптәшкә Борис Кузнецов исемендәге Казан кадет интернат мәктәбендә тәрбияче офицер Тәлгать Камалеевны чакырган.