#Язмыш 13 февраль 2023, 09:21

“Мин сиңа гашыйк булдым бугай. Чыгасыңмы миңа?”

13 февраль 2023, 09:21

Күптән түгел сезнең газетада бер кызыклы язмага тап булдым. Анда болай дип язылган иде: “Туйга кадәр очрашып йөрүнең иң минималь вакыты – 8 ай, максималь вакыты – 5 ел”. Шушыны укыгач, сезгә язарга булдым, чөнки ирем белән бер көн дә очрашып йөрмәдем.

Скопировать ссылку

“Мин сиңа гашыйк булдым бугай. Чыгасыңмы миңа?”

Яшь вакытта авылдан килеп тулай торакка урнаштым. Бүлмәдәш кызым Рания белән уртак телне тиз таптык, сөйләшеп туя алмый идек. Ул үзе чыгышы белән Мөслимнән. Бервакыт Рания мине үзләренә авылга кунакка чакырды. Кайтсак, әти-әнисе мул табын әзерләп куйган! Раниянең абыйсы Рамил белән энесе Раяз да бар иде, алар да безнең белән табын артына утырды.

Кич белән клубка кичке уенга чыктык. Раниянең абыйсы безнең яннан китмичә саклап йөрде. Шулай итеп, ул кичне безне чит-ят егетләр озата кайтмады. Ә икенче көнне капка төбендә утырганда, яныма Рамил килеп утырды да: “Мин сиңа гашыйк булдым бугай. Чыгасыңмы миңа?” – диде. “Чыгам!” – дигәнемне сизми дә калдым.

Рамил белән әнә шулай көтмәгәндә генә кавышып куйдык. Башта кызыбыз, аннары улыбыз туды. Инде алар да буй җитте хәзер. Рамил белән тормыш коруыма бер дә үкенгәнем булмады, без бик бәхетле яшәдек һәм яшибез! Башка парларга да матур, бәхетле гомерләр телим!

Алсу, Казан.

Кызыклы яңалыкларны күзәтеп бару өчен безнең МАХ каналына кушылыгыз.