Айсылу Леронның энесен кибеттән куып чыгаруга карата Сәрия Сабурская: «Мондый очракта Бәхтиярнең туганнары судка мөрәҗәгать итә ала»

Әлеге хәлгә карата Татарстанның кеше хокуклары буенча вәкаләтле вәкиле Сәрия Сабурская үз фикерен белдерде.
- Сәүдә үзәге сакчыларының гамәлләре ачуны чыгара. Кеше кайда булырга тели, шунда бара. Бу хокукны беркемнең дә чикләргә хакы юк. Әйе, без төрле! Тән төсе, дин, үз-үзебезне тотышыбыз, тышкы кыяфәт белән аерылабыз. Әмма бу сакчыларның гамәлләрен акламый.

Бәхтияр башкалар шикелле түгел, аңа игътибар, аңлау күбрәк таләп ителә. Кызганыч, мондый хәлләр булып тора, әйтик, инвалидны самолетка кертмәгәннәр, кафеда хезмәт күрсәтмәгәннәр. Матбугатка килеп ирешкән бу вакыйгалар җәмгыятьтә шау-шу уятмый калмый. Мондый очракта Бәхтиярның туганнары, кешенең конституция хокуклары чикләнү сәбәпле, прокуратурага, шулай ук сәүдә үзәге хезмәткәрләре түбәнсетүне әйтеп, судка мөрәҗәгать итә ала. Тикшерү нәтиҗәләре буенча, гаеплеләр административ (РФ КоАП 5.61 маддә), җинаять җаваплылыгына да (РФ ҖК, 282 маддә) тартылырга мөмкин. Хезмәт, эш белән тәэмин итү һәм социаль яклау министрлыгына, Кеше хокукларын яклау буенча вәкаләтле вәкиллеккә язмача гариза тапшырырга да була. Татарстанның инвалидлар җәмгыяте, республикада эшли торган юридик клиникалар гаризаны бушлай тутырырга ярдәм итә алалар. Инвалидларга карата хөрмәт, аңлау, түземлелек булмаган җәмгыятьне цивилазацияле дип әйтеп булмый. Безгә «үзенчәлекле» кешеләргә карата мөнәсәбәтне үзгәртергә һәм аларга җәмгыятькә яраклашырга ярдәм итәргә кирәк.