«Безгә кайчан фатир булыр икән?»

Арча районы башкарма комитетының инфраструктура бүлеге белгечләре әйтүенчә, Татарстан Министрлар кабинетының 326нчы (2008 елның 16 маеннан) карары нигезендә, торакка мохтаҗ күп балалы гаиләләргә дәүләттән ярдәм күрсәтелә. Шуның нигезендә, биш балалары булган Вәлиәхмәтовлар гаиләсе дә торак шартларын яхшыртырга хокуклы.
- 2014 елда бишенче баласы тугач, Фәридә Вәлиәхмәтова тиешле документларны җыеп, торак алу буенча чиратка басты. Бу программа районда уңышлы эшләп килә. Аны Татарстанның Төзелеш, архитектура һәм торак-коммуналь хуҗалыгы министрлыгы контрольдә тота. Быел Арчада 2008 елда чиратка баскан күп балалы гаиләләргә торак бирелә. Вәлиәхмәтовлар 2014 елда чиратка бастылар, димәк, көтәргә кала. Чиратны берничек тә узып булмый. Закон нигезендә, программа буенча һәр кешегә 18 квадрат метр мәйдан тиеш. Бу очракта гаиләнең милкендә булган торагы да исәпкә алына. Вәлиәхмәтовларга килгәндә, аларга (әнисенә һәм биш баласына) 108 квадрат метр торак каралган. Аларның авылда 49,1 метр мәйдандагы тораклары бар. Шул рәвешле: 108-49,1= 58,9 квадрат метрлы фатирга өмет итә алалар. Гаиләгә торак чират нигезендә, бушлай биреләчәк, - дип аңлатты белгечләр.
Чират, фатир буенча сорауларыгыз булса, Арчада Ирек мәйданы, 12нче йорт адресы буенча урнашкан район башкарма комитетының инфраструктура бүлегенә мөрәҗәгать итә аласыз. Анда сезгә барысын да җентекләп аңлатачаклар.