Камил хәзрәт – иң лаеклысы

Тиздән Татарстаныбыз мөфтиен сайлар көн җитә. Безнең теләк - аның халыкка файдалы, бер үк вакытта заман белән бергә атлый ала торган акыллы кеше булуы. Бүгенге көндәге кандидатлар арасында бу таләпләргә җавап бирердәе, яшерен-батырын түгел, Камил Сәмигуллин инде. «Хәтер» мәчете имамы булган 85 яшьлек хәзрәтебез Харис Салихҗанга да хөрмәтебез зур, билгеле. Әмма олы яшьтәге кешегә бу катлаулы заманда мөфтилек итү авыргарак туры киләчәге көн кебек ачык. Тагын бер кандидат - Россия ислам килешүе ассоциациясенең голәмәләр шурасы башлыгы, 43 яшьлек Фәрит хәзрәт Хәйдәров (Сәлмән) та бу постка бик лаеклы кебек. Әмма никтер күңелгә, әле яшьрәк булса да, Камил Сәмигуллин якынрак. Дини матбугатта да тәртип урнаштырырга, Наилә Җиһаншина җитәкчелегендәге хатын-кызлар оешмасы белән дә эшне бергәләп оештырырга нияте бар икән. Өйләнергә, матур гаилә корып балалар үстерергә ашыкмаучы егетләребезгә дә матур үрнәк бит әле бу 3 бала атасы булган кандидат.