«Мине һавадагы ак халатлы ак фәрештәләр коткарды»

Ник дигәндә, февраль аенда ул язмыш әзерләгән зур сынау белән күзгә-күз очраша һәм, Алланың рәхмәте белән, аны җиңеп чыга.

Үзе өшкерүче, баласызларны балалы итүдә күп көч куючы, авырып, сызланып килүчеләргә шифа биреп дәвалаучы Роза апаны Буада гына түгел, Татарстанда һәм хәтта Татарстаннан читтә дә бик күпләр белә, хөрмәт итә. Кыш ахырында Роза апага инфаркт була. Балалары, оныклары, туганнары һәм аның янына шифа эзләп зар елап килүче күпме кеше өчен борчу була бу хәл. Аны ашыгыч рәвештә Буа хастаханәсенең реанимация бүлегенә салалар. «Мине үлем тырнагыннан йолып алдылар, Буа район хастаханәсенең реанимация бүлегендә яңадан дөньяга кайтардылар», - дип, җан җылысы белән мактый ул үзен терелтүчеләрне. Чыннан да, Буа район хастаханәсенең табиблары могҗиза ясый. Алар көн дими, төн дими, һәр авыру гомере өчен шулай көрәшәләр, шуңа да терелеп чыккан һәр кеше аларны көн дә искә алып рәхмәтләр укый. Светлана Полянская, Наилә Гыйс­мәтуллина, Евгений Одинцов, Марат Чагаев һәм анда эшләүче шәфкать туташлары бик зур мактау сүзләренә лаек. Әлбәттә, эшне дөрес оештыручы баш табиб Рөстәм Самерхановны аерып әйтергә кирәк.

- Әлеге табиблар гади генә кешеләр түгел, аларны Алла үзе сайлаган һәм кешеләргә ярдәм итәр өчен җиргә җибәргән. Мине һавадагы ак халатлы ак фәрештәләр коткарды. Буа хастаханәсендә эшләүче барлык табибларга, шәфкать туташларына һәм һәрвакыт янымда булучы улларыма һәм киленнәремә зур рәхмәтләремне газета битләре аша җиткерәм, - ди Роза апа Гатауллина.