Сәлимҗанов урамында кайчан юньле юл булыр икән?

Без Марсель Сәлимҗанов урамындагы 12нче йортта яшибез. Подъезд алдындагы юллар бик начар. Асфальт чокырланып беткән. Яңгыр яуса, су җыела. Ишегалдындагы, подъезд каршындагы юлны кайчан ремонтларлар икән?

Гамбәрия Гафурова, Казан.

Йортка хезмәт күрсәткән Вахитов районының идарәче компаниясе хезмәткәрләре аңлатуынча, Марсель Сәлимҗанов урамы 12 нче йорт подъездлары каршындагы юлларны төзекләндерү 2017 елгы планга кертелмәгән. Кызганыч, Вахитов белән Идел буе районы хакимиятендә дә өметле сүз әйтмәделәр. «Әгәр финанс мөмкинлекләре булса, әлеге йорт каршындагы юллар ремонтын 2018 елгы программага кертәчәкбез», - дип вәгъдә иттеләр районның торак сәясәте бүлегендә.