Күпләр белә: интернеттагы «Яндекс» эзләү системасында онлайн-тәрҗемәче бар. Теләсә кайсы сүзне язасың да, шундук тәрҗемәсен күрәсең. Әлеге система аерым сүзләрне дә, зур-зур текстларны да нибары бер төймәгә басу белән эх дигәнче тәрҗемә итеп бирә. Моңарчы онлайн-тәрҗемәче рус, инглиз, немец, испан, итальян кебек дөньякүләм таралган телләр белән генә эш итә иде....
Күпләр белә: интернеттагы «Яндекс» эзләү системасында онлайн-тәрҗемәче бар. Теләсә кайсы сүзне язасың да, шундук тәрҗемәсен күрәсең. Әлеге система аерым сүзләрне дә, зур-зур текстларны да нибары бер төймәгә басу белән эх дигәнче тәрҗемә итеп бирә. Моңарчы онлайн-тәрҗемәче рус, инглиз, немец, испан, итальян кебек дөньякүләм таралган телләр белән генә эш итә иде. Шушы көннәрдә, рәхмәт төшкерләре, татарчаны да керткәннәр. Бу хәлгә шатланудан калтыранган кулларым белән берничә сүз язып карадым. Йа Хода, «Яндекс» биргән тәрҗемәләрдән авып китә яздым. Баксаң, «дәфтәр» сүзе русча «книга» икән. «Тал» - «люди». Ә «кычыта» дигән сүз русча ничек була, беләсезме? Тотынып утырыгыз. «Кычыта» сүзе русчага «причем первое время идет» дип тәрҗемә ителә икән. Менә сез татар телен яхшы беләбез дип уйлаган идегезме? Их же ворота! («Тотыгыз капчыгыгызны!» дигән сүзтезмәне «Яндекс» әнә шулай тәрҗемә итте).
Бу тәрҗемәләр өчен кем дә булса акча алганмы? Ничә тиен? Моңарчы үтә дә профессиональ эшләгән «Яндекс» хезмәткәрләре үзләренең төп башына утыртуларын аңлыймы? («Төп башына утырту» - «основные посадки на голову»). Бу турыда мәгълүмат әлегә юк. Ә бит кирәк бу онлайн-тәрҗемәче. Бик кирәк татарга. Тик мондый хәлдә түгел.
«Яндекс» тәкъдим иткән кайбер тәрҗемәләр
елга - год
юмарт - оказывает
абага - брат в
шифа - для
сукмак - как на войне
каләмдәш - по совету коллег
көтүче - которые ждут
бөккән - г., которые
кармак - бывает
лачын - лач вообще
казылма - национальной гусей
амбар - в закрома родины
үлеш - после смерти должно
алмагач - поскольку могут
шакмак - так оно и вышло
аслы-өсле - населения под-населения над
кырыну - поле открытия
чалма - набережные челны республики татарстан
сабын - терпения не
керегез - входите
кермәгез - не входит
калдырмас - аллах не остается
