Кайчандыр яшәп киткән җиде бабаңны белү җиңел эш түгел

Максатлары изге: һәр кеше үзенең җиде бабасын һәм җиде әбисен белергә тиеш. Ә бу аңа бүгенге катлаулы дөньяда яшәгәндә, бик кыен чакларда калганда да, ялгыз түгеллеген аңлар, борынгы әби-бабайларыннан, нәсел-ыруыннан рухи көч алыр өчен кирәк. 

– Бу файдалы ярышны быел да уздырырга уйлап торабыз, - диде “Гаилә” мәчетенең имам - хатыйбы Рөстәм хәзрәт Хәйруллин әлеге чарага багышланган матбугат конференциясендә. – Яшьләр үткәннәрне белсеннәр, өйрәнсеннәр өчен ел саен оештырырга тырышабыз. Быелгысына эшләр 6 февральдән 15 апрельгә кадәр кабул ителәчәк.

Катнашучыларны нәсел агачы төзеп кенә калмыйча, үз буыныңны ныклап өйрәнеп, ул нәселдән кемнәр чыккан, нинди билгеле шәхесләр, аларны да барларга чакыралар. Шулай итеп, үзеңең нәселең белән бергә милләтең белән дә горурлану уятырга уйлыйлар. 

Бәйгенең быелгысы да Татарстан архив эше буенча дәүләт комитеты, Татарстан Министрлар кабинетының ЗАГС идарәсе белән берлектә оештырыла. “Мөселманнар “ газетасы һәм “Гаилә һәм мәктәп “ журналы да мәгълүмати ярдәм күрсәтергә әзер. 

Гаилә институтының нигез ташлары җимерелеп, кыйммәтләр үзгәргән безнең заманда мондый бәйгеләр катнашучы яшьләребезгә тамырларының нык булуын, аларның ерак үткәнгә тоташуын аңларга булышыр. Ә бу үзеңнең дүңгәләк түгел, ә тамырлары тирән имәннең бер ботак-яфрагы итеп тоярга, нинди генә явыз җилләр иссә дә, аягыңда нык басып калырга ярдәм итәр дип өметләник. 

Кайчандыр яшәп киткән җиде бабаңны белү җиңел эш түгел. Ләкин теләге булганнарга эшли алмаслык гамәл дә түгел. Ярдәмгә килергә әзер торучылар да бар. ЗАГС, архив хезмәткәрләренә тагын “Ядкәр” генеология оешмасы да өстәлә. Алар үз сайтларын тулыландыру буенча зур эш башкаралар, ә портал үзе тулысынча 2027 елда гына ачылачак. Бу хакта оешманың җитәкчесе Айсылу Галиева сөйләде. Дәүләт архивы хезмәткәре Гүзәл Илдарханова балчыклы шәҗәрә төзергә теләүчеләргә бүген үк булышырга әзер торуларын әйтте. Дөрес, документлар күпмедер бәягә төшәчәк. Прейскурантлары сайтта бар икән. Ә бу изге эшне бүген исән булган иң олы әби-бабаңнан, туган-тумачаңнан башларга киңәш иттеләр. 

Ә бит гаилә тарихы - ул авыл тарихы. Авыл тарихы ул - ил тарихы. “Үткәнен белмәгәннең киләчәге юк!” -  дигәнне без еш кабатлыйбыз. Киләчәгебез булсын һәм ул матур да булсын өчен кирәк безгә мондый бәйгеләр. “Туганлык җепләрен өзмәгәнгә озын гомер насыйп булыр” - дигән бит Пәйгамбәребез Мөхәммәд (сгвс). Димәк,“Нәселебез шәҗәрәсе”нең быелгысы да милләтебезгә, динебезгә дә озын гомер юрый. Катнашыйк , ярдәм итик!