Корбан гаете алдыннан белгечләр республикада үрчетелгән корбанлык алырга чакыра

Читтәгегә кызыгырга кирәк түгел, чөнки алар төрле йогышлы терлек авырулары таратырга мөмкин. 
Татарстан Министрлар Кабинеты каршындагы Баш ветеринария идарәсе башлыгы урынбасары Габделхак Мотыйгуллин билгеләп узганча, үткән елны Казандагы бер мәчеткә корбанлыкка ветеринария белешмәсе булмаган сарыкларны китерү очрагы булган. Ветеринария белгечләре бу мәсьәләдә бик катгый, сарыкларны чалырга юл куймаганнар, каян китергәннәр, шунда кире озатканнар. 
– Республикага кертелгән һәр партия терлекнең ветеринария белешмәсе булырга, ә терлекләр идентификацияләнергә тиеш. Шулай ук карантин чаралары да үткәрелү шарт, – дип ассызыклап үтте спикер матбугат очрашуында.   

Россельхознадзорның Татарстан буенча идарәсенең ветеринария күзәтчелеге бүлеге башлыгы урынбасары Артур Заһидуллин әйтүенчә, республикага ветеринария белешмәсе булмаган терлекләр еш кына бруцеллез буенча имин булмаган төбәкләрдән дә килә.
– Кешеләрнең акчаны янга калдырырга тырышу факты да проблема тудыра, чөнки махсус белешмәсе булмаган терлекләрнең хакы арзанрак. Терлекләрне документларсыз кайтару фактын алар ветеринария хезмәтеннән яшерергә тырыша, чөнки аларга әлеге терлекләрне карантинга куярга, эпизоотиягә каршы чаралар үткәрергә туры киләчәк. Ә сатучыны табу алай ук кыен түгел, – ди ул.  
Быел 2 меңнән артык транспорт чарасы тикшерелгән, санкцияләнмәгән терлек кертүнең 16 очрагы ачыкланган.

Хәтерләсәгез, 2023 елда Әтнә һәм Яңа Чишмә районнарында терлекләр арасында очрый торган иң куркыныч чирләрнең берсе – бруцеллез авыруы табылган иде. Быел да Россиядә бруцеллез буенча вазгыять бик киеренке. Агымдагы елда илнең 14 төбәгендә 63 шундый чыганак теркәлгән. Күрше төбәкләр: Башкортстанда – 4, Мордовия, Пенза һәм Татарстанда – 1әр чыганак. Күп очракта авыру таралуның сәбәбе булып ветеринария идарәсе белән килештермичә һәм документларсыз терлек сатып алу тора. 
Белгечләр, Корбан гаете алдыннан бу мәсьәлә аеруча актуаль, дип билгеләп үттеләр.