Мамадышта яшәүче махсус хәрби операциядә катнашучыларга 34 мунча төзеп җибәргән

Юрис бабай... Махсус хәрби операциядә хезмәт иткән егетләр аны яратып шулай дип йөртә. Мамадышта яшәүче 64 яшьлек Юрис абый Шәкүров төзеп биргән 34 мобиль мунча бүген ничәмә-ничә солдатны сөендерә. 

Ир кешегә җитмеш һөнәр дә аз дип юкка гына әйтмиләр. Юрис абый Шәкүров нәрсәгә генә тотынмасын, барысын да булдыра: менә дигән итеп Сабантуйлар алып бара, көрәш турнирлары оештыра, чишмәләр төзекләндерә, агачлар утырта. Йортларын да өч баһадир улы ярдәме белән үзләре торгызганнар! Берничә ел элек рәссамлык сәләте дә уяна үзендә – ул ясаган картиналардан районда күргәзмә дә оештырылган хәтта.

Юрис абый махсус хәрби операциядә катнашучыларга ярдәм итүдән дә читтә кала алмаган. Баштарак егетләрне ит белән тәэмин итеп торырга тырышкан. Хатыны белән берничә дистә сарык асрый алар. Әмма җәйгә чыккач, ит бозылыр дип курка һәм булышуның башка чараларын уйлый башлый. Шул чакта махсус хәрби операциягә Мамадыш районыннан киткән егетләр өчен мунча ясап бирсәң яхшы булыр иде дигән фикергә килә. Әмма берничәне ясап җибәрүе була, башка районнардан да үтенечләр ява башлый. Бераздан Татарстаннан читтәгеләр дә ишетеп ала. Севастопольдән кадәр элемтәгә чыгалар. Мамадыш районы башлыгы Анатолий Иванов та аны хуплап, бу башлангычында ярдәм итеп тора. 

– Бу эшкә алынганда, бер мунча ясау ай буена сузылган иде. Эшләп караган эш түгел бит. Бар ягын да уйлап, мунчаны мөмкин кадәр уңайлы һәм җиңел дә итү мөмкинлекләрен эзләп башкарып чыктым. Аннары инде бер айда икене ясап җибәрә алдым. Кирәк чакта өч улым ярдәмгә килә.  Хәзер бу эш безнең конвейер кебек оештырылган. Айга 5-6 мунча да ясап җибәрү мөмкинлеге бар, - ди Юрис абый. 

Юрис абый башта Алабугадан өр-яңа прицеп сатып ала. Аннары металл конструкциядән мунча каркасын җыя, тышын калай белән тышлый, эченә җылылык саклый торган материал салып калдырып, фальш брус дигән вагонка белән төрә. Шуннан соң тыштан ягыла торган итеп миче урнаштырыла, кайнар су өчен савыт беркетелә, эскәмияләр куела. Зурлыгы буенча мунчалар 2,5 метр озынлыкта, 1,64 см киңлектә.  

Мунчалар ясап җибәрә башлагач, Юрис абый Шәкүровка хәрбиләрдән рәхмәтләр ява башлаган. Үзе дә Севастопольгә ике тапкыр барып кайттып, үз куллары белән ясаган мунчаларда юынып чыккан егетләрнең никадәр сөенгәнен күргән. 

– Мунчаны алар икмәктән соң икенче урынга куя. Ипи белән алар тамак туйдыра, көч җыя, ә мунча керү алар өчен чистарыну, тәннәрен ял иттерү ысулы, - ди Юрис абый, кирәкле була алуына шатланып.

Донецкка җибәрелгән мунчаларның берсен хәрбиләр, “перевязочный”лары шартлагач, хәтта яраларны бәйләү урыны итеп тә җайлаганнар. Җылытыла да, суы да бар бит. Бу очракта да файдасы тигән әнә! 

Юрис абый 12 яшендә әнисен югалтып, үги әни кыерсытуларын татып, ятимлек ачысын тоеп үскән булса да, бәгыре катмаган аның. Кешеләргә гел яхшылыклар гына кылып яшәргә тырыша ул, бер эшсез торганы юк. Ике дистә елдан бирле машина йөртүче булып хезмәт куя, төзелештә прораб вазыйфасын да үтәргә туры килә. Профессиональ спортчы – көрәшче дә әле ул, дүрт ел элек туган ягы Кече Кирмәндә көрәш турнирлары да уздыруга да алынган. Өч улы да танылган көрәшчеләр, икесе спорт мастеры, берсе – спорт мастерына кандидат. Гомумән, ир-егеткә тиешле өч миссияне дә үтәдем дип күкрәк киереп әйтә ала Юрис абый: өйләнеп, өч пәһлеван егетен дә үстергән, агачларын да утырткан, йортларын да сафка бастырган. Әмма тиктормас холыклы кеше шулай дип кенә тынычланамы соң? Һәр кеше иртәсен нинди яхшылык эшли алам икән дип башласын иде, ди ул.