Татарстанда яшәргә җыенсаң, документың булсын

Штраф язылса да, рөхсәтсез яшәгән гражданнар үз илләренә мәҗбүри кайтарып җибәрелмиләр.

Россия Президенты Владимир Путинның мигрантларга кагылышлы Указы нигезендә гамәлгә ашырыла әлеге чаралар.

Татарстан буенча Эчке эшләр министрлыгының миграция мәсьәләләре идарәсе җитәкчесе Марат Галиев әйтүенчә, республикада 99 мең чит ил кешесе теркәлгән, шуларның 22 меңе илебездә озак вакыт яшәргә рөхсәт алган. Үзбәкстан, Таҗикстан, Төрекмәнстан республикаларыннан эшкә һәм укырга күпләп киләләр Татарстанга.

– Илебездә рөхсәтсез яшәүче чит ил гражданнарыннан 30 апрельгә кадәр полициянең миграция мәсьәләләре буенча бүлекчәләренә килеп теркәлү узулары сорала. Алар медицина тикшерүе үтәргә, рус теленнән имтихан бирергә, бармак эзләрен тапшырырга тиешләр. Теркәлмичә яшәгән чит ил гражданнарына штраф салына, әмма алар үз илләренә кайтарып җибәрелми, ягъни Россиядә яши һәм эшли бирәләр. Ләкин, теркәлмичә яшәгән чит ил гражданнары 1 майдан соң суд карары белән үз илләренә инде мәҗбүри рәвештә кайтарып җибәреләчәкләр, – дип кисәтте Марат Галиев.

Россиядә теркәлмичә яшәүче чит ил гражданнары банк хезмәтләреннән файдалана алмый, транспорт чарасын идарә итү һәм күчемсез милекне рәсмиләштерү хокукы юк, балаларын мәктәпкә яки балалар бакчасына урнаштыра алмый, андыйларга СИМ-карта сатылмый.  

Марат Галиев чит гражданнарын эшкә чакырган предприятиеләрне, шулай ук Россиядә яшәргә рөхсәт кәгазен һаман да алмаган чит ил гражданнарын бу эшне 30 апрельгә кадәр башкарып чыгарга киңәш итте.