Шәһри Казан

Арчада авыру эләктергән 3000гә якын терлекне сугымга җибәрергә мәҗбүрләр

Көз көне кош гриппы аркасында республиканың берничә районында җиде мең баш каз юк ителгән иде. Инде тагын бер күңелсез яңалык. Арча районының Курса-Почмак авылында урнашкан «Ак Барс» агро хуҗалыгында сыерларда туберкулез авыруы ачыкланган. Бу якынча 2800 баш сыер. Алардан башка бозаулар да бар.

Ничә баш бозау икәнлеген безгә бүген генә төгәл итеп әйтә алмыйбыз, диделәр. Хуҗалыктагы бөтен мал-туар сугымга китәчәк. Терлекләрдә туберкулез ноябрь аенда ук табылган. Арча районының баш эпизоотологы Айрат Фазлеев сүзләренчә, тикшерү барышында ветеринарлар 315 сыерда туберкулез авыруы барлыгын ачыклаган.

- Ветеринария кагыйдәләре буенча, малларның 15 процентында чир табылса, аларның барысы да сугымга озатыла. Ноябрьдән бирле сыерларны Алабугага ит эшкәртү комбинатыннан килеп алалар. Ә сөтләрен Алексеевскиның сөт комбинатына җибәрәләр, алардан коры сөт ясыйлар, - дип сөйләде ул. 

Реклама

Туберкулез авыруының таралу сәбәбен исә сыерларның яшәү шартлар белән бәйләп аңлатты. 
- Мегафермада терлекләр күп, кыш көне алар урамга чыкмыйлар. Дымлылык та югары, чөнки көннәр буе су агызыла. Ферма терлекләр тотарга көйләнмәгән. Аны елына ике тапкыр дезинфекцияләргә тиешләр, бу таләп үтәлмәгән. Мондый шартларда туберкулез таякчыклары активлаша һәм ул бер сыердан икенчесенә бик тиз тарала. Авыру табылган сыерлардан котылып кына бу проблеманы чишеп булмый, ферманы бөтен малдан чистартырга кирәк. Аларны озатып бетергәч, фермадагы агачтан нәрсә бар, шулар алып яндырылачак, кардалар алыначак һәм дезинфекцияләнәчәк. Хәзерге вакытта ферма эшчеләре махсус киемнәр кия, һәрдаим дезинфекция уздырыла, - диде ул. 

Министрлар Кабинетының Баш ветеринария идарәсенә дә сорауларыбызны юллаган идек, алар дүшәмбе көнне җавап бирергә вәгъдә итте.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: