Авылга да, шәһәргә дә ярый

“Татарстанның яшьләр үзәге” учреждениесе сәнгать җитәкчесе Гөлфия Мотыйгуллина хәбәр иткәнчә, иҗат төркемнәре өч юнәлештә эшләячәк. «Паблик-арт» юнәлешендә эшләүче яшь рәссамнар һәм архитекторлар авыл территориясендә арт-объектлар ясаса, «Этно-фьюжн» дигәне музыкантларны җәлеп итәчәк. Алар фолк жанрында яңа композицияләр иҗат итәр дип көтелә. «Локал хистори» юнәлеше экскурсоводлар өчен. Бу лабораториядә яшьләр авылда яшәүчеләр һәм туристлар өчен тематик экскурсияләр эшләячәкләр. 

–  Барлык лабораторияләр дә үз продуктларын 6 август көнне «Авыл һәм шәһәр көне» шоу-кейсында тәкъдим итәчәк, – дип белдерде  Гөлфия Мотыйгуллина журналистларга.  
Спикер ассызыклап узганча, проект яшьләрнең сәләтен ачарга, төрле районнарда яшәүче егет һәм кызларны берләштерергә, таныштырырга ярдәм итәчәк. 
Проектның максаты да – яшьләр арасында традицион рухи-әхлакый кыйммәтләрне креатив индустрия аша таныту. Кукмара, Балтач, Саба һәм Мамадыш районнары яшьләре, сайлап алынганнан соң, төркемнәргә берләшеп, уникаль иҗади проектларны гамәлгә ашырачак.