Бәрәңге корты һәм эт эчәгесеннән ничек котылырга? Рәис абый Шәкүров киңәше

– Бәрәңге корты 40 градус суык булса да үлми. Кышның нинди килүенә карамастан, аннан котылып булмый. Ул бит ясалма корткыч, суыгын да, эссесен дә белми. Агуласаң гына инде. Без бәрәңге утырттык, кортлар күренмәде. Былтыр алар бакчада бик әз булды. Мин моны озын сабаклы булып үсә торган яхшы сортлы бәрәңге утыртудан күрәм. Луговской, Рамон, Удача, Розара сортларын утыртабыз. Сабаклары бер метр тирәсе була, алганда кыенга туры килгәч, ичмасам, кортлар да ашап бетермәгән дип сукранам аптырагач. Невский дигән сортның сабагы кыска була менә, корт ашап бетерә, – ди ул. 

Эт эчәгесеннән котылу өчен бакчага чи тирес кертергә киңәш итә. “Терлек күп асрыйбыз, сидеге бер кая агып төшми, зур итеп казылган чокырга җыелып бара. Көзен, кышын бакчага чыгарып түгәм шуны. Ул шул аммиак суы бит, эч эчәгесенең тамырын корыта. Тиресне черетеп кертергә кирәкми, чөнки аннан берни калмаган була. Тиресне кертәм дә сукалыйм. Ел да кертәм тиресне.

Җир беркайчан да тирестән туймый. Бозмый, күпертә генә. Гомер-гомергә тирес түктеләр. Ә менә тирес белән алабута орлыгы керә анысы. Әмма бәрәңге тишелгәч ат белән ике тапкыр тырмалагач бетә алары да. Тик моны эссе көнне көндез эшләргә кирәк”, – дип аңлатты тәҗрибәле авыл агае.