#Авыл 22 апреля 2020, 17:19 Уку өчен 2 минут

"Кулның эштән бушаганы юк, Аллага шөкер!"

22 апреля 2020, 17:19

Уку өчен 2 минут

Авылда да акча эшләп була. Эштән һәм авырлыклардан курыкмаганнарга мөмкинлекләр күп. Район җирендә эш юк диючеләрне аңламыйбыз да, акламыйбыз да.

Скопировать ссылку

"Кулның эштән бушаганы юк, Аллага шөкер!"

Кама Тамагы районында яшәүче Регина һәм Данис Саттаровлар шулай ди. Районның иң уңган яшь гаиләләренең берсе алар. Дүрт эл элек теплицада чәчәк һәм яшелчә үсентеләре үстереп сату белән шөгыльләнә башлаганнар. Бүген аларның теплицасында 150 мең төп чәчәк һәм 30 мең төп яшелчә үрентесе үсә.

Данис һөнәре буенча җир төзелеше инженеры, ә Регина – муниципаль хезмәткәр. Гаилә корганда ук яшь пар районда төпләнеп калырга ниятләгән. Икесе дә тынгысыз җанлы булгач, көннәр буе кабинетта утырып эшләүне иркен җир эшенә алыштыралар. Үсентеләр үстереп сату идеясе дә Данисның уены-чыны белән кабинетта эшләп утырганчы мин чәчәк үстереп сатам дигәненнән башланган. Аллаһы Тәгаләнең амин дигән чагына туры килде, чынлап та шушы эшкә керештек, ди Регина.

Үз эшләрен 150 мең сум акчадан башлаганнар. Эш башлаган елларында 15 мең төп чәчәк үсентесе үстереп сатканнар. Ел саен заманча яңа технологияләр кулланып, теплицаны зурайтып торалар. Бүген анда петуния, бархатцы, сальвия, виола, бальзамин, пеларгония, лобелия, бегония, мирабилис, вербена, примула, калибрахоа, колеус, портулак, цинерария, алиссум һәм башка төр чәчәк үсентеләр гөрләп үсә. Томат, баллы борыч, баклажан, кыяр, ташкабак кебек яшелчә үсентеләре дә алардан калышмый. Быел базилик, темьян, розмарин, руккола кебек тәмләткечләр дә утыртып караганнар.

– Үсентеләрне сату белән проблема юк. Башта райондагы оешмалар сатып алса, соңгы ике елда республиканың башка төбәкләреннән дә кызыгып килүчеләр бар. Мәскәүгә дә озатабыз. Аллага шөкер, кулның эштән бушаганы юк, нәтиҗәсе дә күренә. Тырыш булсаң, эш яратсаң, авылда да менә дигән итеп яшәп һәм эшләп була, – ди Данис.

Кызыклы яңалыкларны күзәтеп бару өчен Вконтактега кушылыгыз.