“Тикшермичә, бер бөртек бодайны да сатып булмаячак”

Быелның башыннан инде 50 мең тонна ашлык озатылган. Бу эшләр Россельхознадзор идарәсе контроле белән башкарыла. 

Татарстан буенча Ветеринар һәм фитосанитар күзәтчелек буенча федераль хезмәте идарәсе җитәкчесе урынбасары Айрат Таҗетдинов билгеләп үткәнчә, бодай белән арпа Казахстанга, Кытайга китә. Арыш – Казахстан, Латвиягә; солы – Чехия, Испания, Польша, Таҗикстан, Казахстанга; кукуруз – Казахстанга; җитен – Германия, Чехия, Беларусь, Польшага; горчица – Белоруссия, Чехия, Австрия, Германия һәм Польшага. Татарстанда бөртеклеләр күп җитештерелә, димәк, аны тикшереп тору да тиешенчә булырга тиеш, ул.

«Ашлык сыйфатын бәяләү үзәге» ФДБУнең Татарстан Республикасы филиалы директоры Татьяна Менликиева хәбәр иткәнчә, дустанә ил булуга карамастан, Кытай продукциягә шактый кырыс таләпләр куя. Әйтик, Россиядә ашлык 230 пестицидка тикшерелә, ә Кытайда – 516 пестицидка. Иран исә сыйфатка басым ясый ди.

ГМО га килгәндә, спикер сүзләренчә, бөртекле культураларда моның белән проблемалар юк. Әмма 2021 елда, Иранга рапс озатырга җыенганда, аның эзләре табылган. Бәхетләренә, вакытында күреп алып, эш җәнҗалга барып җитмәгән.

– Шул ук вакытта Татарстанда сыйфаты аркасында экспортка җибәрелми калган ашлык юк. Җитештерүче партияне алдан ук күп тапкырлар тикшерә. Шуңа да резонанс тудырган очраклар булганы юк, – диде Татьяна Менликеева.

Ә инде тикшерү лабораториясендә куркыныч һәм сыйфатсыз продукция ачыкланган очракта, алар Россельхознадзорның территориаль идарәсенә хәбәр итә. Идарәдәгеләр карар чыгарып, тиешле чараларын күрә. 

Әмма пестицидларга аерым тукталды. Татарстанда ул очрый, һәм безне бик борчый торган зур концентрацияләрдә, диде ул.
Бу өлкәдә яңа кагыйдә эшли башлавын да ассызыклады. Быел Россиядә бодайга мәҗбүри дәүләт сыйфат мониторингы үткәрелә башлаячак. Ансыз быел бер генә бөртек бодайны да сатып булмаячак.

Һава торышы да ашлыкның сыйфатына йогынты ясамый калмый. 

– Пестицидлар дип әйтеп уздык, узган ел яңгырлар булмаганга, алар юылмаган, дигән нәтиҗәгә килдек. Кояшы, җылысы, яңгыры күбрәк булган саен, 3-4 класслы бодай алып була. Бу республикабызны гына түгел, башкаларны да тәэмин итә алабыз дигән сүз, – диде Татьяна Менликиева.

Фото: © «Татар-информ», Салават Камалетдинов