#Авыл 11 марта 2020, 10:11

Йортымны су баса

11 марта 2020, 10:11

Ел саен йортыма су керә, дип зарлана Яшел Үзән районының Норлат авылында яшәүче 83 яшьлек Сәлимә апа Зыятдинова. Быел кыш җылы килгәч, кар сулары язны да көтеп тормаган, укучыбызның идән астын берничә тапкыр тутырырга өлгергән. Чарасызлыктан Сәлимә апа, ярдәм сорап, редакциябезгә мөрәҗәгать итте.

Скопировать ссылку

Укучыбызның йорты урамның түбән очындарак урнашкан, әллә ни текә тау да түгел, тик язгы кар суларын туктатып булмый, күрәсең. Без килгәндә, көн салкынчарак иде, тик су басулар еш була икән аның өендә.

Сәлимә апалар күршесендә тагын берәүләр яши. Әмма алар йортларының нигезен күтәрткәннәр. Шуңа да су басу аларга янамый. Бу мәсьәләдә Сәлимә апа Норлат җирле үзидарәсенә дә мөрәҗәгать итеп караган. 2018 елда су ага торган канауны тирәнәйтеп киткәннәр, быел гыйнвар аенда Сәлимә апа биләмәсендәге карны трактор белән килеп чистартканнар. Әмма су, вакытлыча туктап торса да, хәзер тагын үз юлын алган.

– Кар сулары идән астын, ишегалларын басу безнең авылда ят күренеш түгел, йортларның 80 процентына яз көне су керә. Күбесенчә җир асты сулары зыян китерә. Ә Сәлимә Зыятдиновага килгәндә, аның йортын су басуның сәбәбе – күп очракта, чистартылмаган кар. 80 яшеннән узган кешегә ничек тә ярдәм итәргә тырышабыз, трактор белән килеп, ишегалды тирәсен кардан да чистартып китәбез, әмма авылда кеше күп, мөрәҗәгатьләр җитәрлек, гел кар көрәп тора алмыйбыз. Кар сулары кермәсен өчен, йортны күтәртеп карарга була. Тик моны балалары белән сөйләшеп эшләсәләр генә, – диде Норлат авылы башлыгы Ринат Баһаветдинов.