Быелгы “Fashion Iftar”га нинди төстәге кием сайларга?

Быел илнең иң масштаблы хатын-кызлар ифтары 20 мартта “Казан Экспо” күргәзмәләр залында узачак. Кунаклар саны 1300гә җитәчәк, ди чараны оештыручылар. Ифтарга чит илләрдән дә кунаклар чакырулы. 

«Modest Covered» проекты авторы, әхлаклы мода өлкәсендә эксперт Җәннәт Минһаҗева сүзләренчә, ифтарның төп темасы – көнчыгыш сәнгате һәм төсе дә шуннан чыгып билгеләнгән. 

– Дресс-кодның 60 проценты әфлисун төсендә булырга тиеш. Әмма шул бер төсне генә күз алдында тотарга кирәкми. Аның башка бик күп төсмерләре дә бар. Стилистыбыз махсус гайд әзерләде. Кайсы төснең нинди төс белән яраклашуы, кайсы брендларга мөрәҗәгать итеп булуы анда күрсәтелгән, – диде ул матбугат очрашуында.

Төп тема кынчыгыш сәнгате булса да, татар сәнгате турында да онытмаячакбыз, дип тә ассызыклады ул. 
– Безнең өчен бу бик мөһим. Шул уңайдан заманча Mon татар театрын да чакырдык. Ул программаның бер өлеше булачак, – диде Җәннәт Минһаҗева. 
Ифтарның партнеры – “Туган авылым” комплексын оештыручыларның берсе булган Радик Абдрахманов ифтарны елдан-ел масштаблырак, кызыклырак һәм эчтәлеклерәк итеп оештырырга тырышуларын билгеләп үтте. 

Елдагыча, кунаклар арасында гомрәгә юллама уйнатылачак. Тагын бер юллама иң актив волонтерга бүләк ителәчәк. Алардан тыш та кыйммәтле бүләкләр уйнатыла, дип вәгъдә итә оештыручылар. 

Ифтар кысаларында, традициягә кергәнчә, мода да күрсәтеләчәк. Быел җиде бренд катнашырга теләк белдергән. Алар махсус ифтар өчен коллекция булдырачак, диде проект координаторы Эльза Зигантдинова. 

Быел ифтар ике көн узачак. Икенче көн мода темасына кагылышлы бизнес программага багышланган. Ул Камал театрының яңа бинасында узачак. Килгән кунакларны маркет һәм лекторийлар көтә. Әлеге чарага дресс-код белән килү мәҗбүри түгел һәм анда ир-атлар да катнашачак.